Աննալենա Բերբոկ. «Գերմանիան պատրաստ է նույնիսկ բարձր գնով պաշտպանել հիմնարար արժեքները Ռուսաստանի հետ Ուկրաինայի շուրջ վեճում»
Գերմանիան պատրաստ է պաշտպանել հիմնարար արժեքները Ռուսաստանի հետ Ուկրաինայի շուրջ վեճում, նույնիսկ եթե դրա համար կպահանջվի բարձր տնտեսական գին վճարել:
Այդ մասին այսօր Մոսկվայում Ռուսաստանի արտաքին գործերի նախարար Սերգեյ Լավրովի հետ զրույցից հետո ասել է Գերմանիայի արտաքին գերատեսչության ղեկավար Աննալենա Բերբոքը:
«Մենք այլընտրանք չունենք, նույնիսկ եթե անհրաժեշտ լինի բարձր գին վճարել», - ասել է Բերբոքը, բայց և ավելացրել, որ Գերմանիան պատրաստ է Եվրոպայում անվտանգության հարցերի շուրջ Ռուսաստանի հետ լուրջ երկխոսության:
Բերբոքը նաև անդրադարձել է Ռուսաստանից Գերմանիա Բալթյան ծովով անցկացված «Հյուսիսային հոսք-2» գազատար խողովակաշարի խնդրին:
«Գերմանիան վերահաստատում է, որ եթե փորձ արվի էներգետիկան օգտագործել որպես զենք, դա հետևանքներ կունենա «Հյուսիսային հոսք-2» ծրագրի համար», - ասել է արտգործնախարարը:
Նա մտահոգություն է հայտնել այն կապակցությամբ, որ Ռուսաստանը հզոր բանակ է մոտեցրել Ուկրաինայի հետ սահմանին:
Ռուսաաստանի արտգործնախարար Լավրովը, իր հերթին, հույս է հայտնել, որ Բեռլինը և Փարիզը «կկարողանան Ուկրաինայի նախագահ Զելենսկուն համոզել կատարել նորմանդյան ձևաչափով բանակցություններում ստանձնած պարտավորությունները»:
ԱՄՆ պետական քարտուղար Էնթոնի Բլինքենն այս շաբաթ Կիևում հանդիպելու է Ուկրաինայի նախագահ Վլադիմիր Զելենսկու և արտգործնախարար Դմիտրի Կուլեբայի հետ, ինչից հետո կմեկնի Բեռլին, որտեղ կհանդիպի Գերմանիայի արտգործնախարար Բերբոքի հետ: