Ալեքսեյ Նավալնին ստացել է Ազատության մեդալը
Բանտում ազատազրկման պատիժը կրող Ռուսաստանի ընդդիմության լիդեր, Կոռուպցիայի դեմ պայքարի հիմնադրամի հիմնադիր Ալեքսեյ Նավալնին ստացել է Ազատության մեդալը, որը շնորհում է «Կոմունիզմի զոհերի հուշահամալիր» ամերիկյան ոչ կառավարական հիմնադրամը:
«Ամերիկայի ձայն» ռադիոկայանի հաղորդագրության համաձայն, մեդալը Վաշինգտոնում Նավալնիի անունից ստացել է նրա նախկին մամլո քարտուղար Աննա Վեդուտան:
«Հիմա Ալեքսեյ Նավալնիի, Կոռուպցիայի դեմ պայքարի հիմնադրամի, աշխարհի բոլոր մարդկանց համար ամենակարևորն է դադարեցնել պատերազմն Ուկրաինայում»,- իր ելությում ասել է Վեդուտան:
Նրա խոսքով, այդ նպատակին հասնելու համար պետք է պատերազմի մասին ճշմարտությունը հասցնել Ռուսաստանի քաղաքացիներին:
Նա այսօրվա իրավիճակը համեմատել է խորհրդային այն տարիների հետ, երբ մարդիկ, ի վերջո, դադարել են վստահել պաշտոնական տեղեկատվությանը:
Նավալնիի անունից Վեդուտան տեղեկատվական ոլորտի հսկաներին կոչ է արել պատերազմի հակառակորդներին տրամադրել ռուսաստանցիներին հասցեագրված տեղեկատվական լայնածավալ քարոզարշավ իրականացնելու հնարավորություն:
«Կոմունիզմի զոհերի հուշահամալիր» հիմնադրամը ստեղծվել է 1993 թցականին ԱՄՆ Կոնգրեսի նախաձեռնությամբ:
Հիմնադրամը մրցանակը շնորհում է մարդու իրավունքների պաշտպանության, կոմունիստական և բռնապետական այլ ռեժիմներին ընդդիմանալու համար:
Նավալնիին Ազատության մեդալն այս տարվա հունվարին տրվել է «Վլադիմիր Պուտինի ռեժիմին խիզախորեն ընդդիմանալու համար»: