Ռուսաստանը մոբիլիզացնում է մարդկանց, որ ուղարկի մահվան, մենք մոբիլիզացնում ենք քաղաքակիրթ աշխարհը՝ հանուն կյանքի. Զելենսկի
Ռուսաստանը այսօր պաշտոնապես հաստատեց, որ Ամանորի գիշերը առնվազն 89 զինվոր է կորցրել Մակեևկայում՝ է'լ ավելի մեծացնելով երկրում նկատվող զայրույթը բանակի հրամանատարության նկատմամբ։
Անգամ Կրեմլին մոտ կանգնած աղբյուրները չեն բացառում, որ իրականում զոհերի թիվը կարող է հարյուրների հասնել։
«Սպանվածների թվում է նաև փոխգնդապետ Բաչուրինը», - այսօր հայտնել է Պաշտպանության նախարարությունը՝ հավելելով, որ հանձնաժողով է ստեղծվել՝ կատարվածի մանրամասները պարզելու համար։
Ու թեև այդ հանձնաժողովը դեռ իր եզրակացությունը չի հրապարակել, գերենալ Սևրյուկովն արդեն շտապել է շարքայիններին մեղադրել. - «Հիմա արդեն ակնհայտ է, որ դա տեղի է ունեցել հիմնականում բջջային հեռախոսների օգտագործան հետևանքով, որոնք միացվել են, չնայած արգելանքին»։
Մինչդեռ ռուսական Տելեգրամ ալիքները հրամանատարությանն են մեղադրում՝ պնդելով, թե զինվորական կացարանները եղել են զենք-զինամթերքի պահեստներին մոտ, որոնք պայթել են հրթիռակոծությունից՝ բազմապատկելով զոհերի ու վիրավորների թիվը։ Ռուսաստանի պաշտպանության նախարարության մամուլի ծառայության նախկին աշխատակից Միխայիլ Զվինչուկի Տելեգրամ ալիքը հայտնել էր, որ բոլոր մահացածները մոբիլիզացվածներ էին։ «Ազատության» ռուսական ծառայության Sever.Realii-ի խմբագրությանը հաջողվել է զրուցել նրանցից մի քանիսի հարազատների հետ։
«Խնդրում եմ, նույնիսկ նրա անունը մի գրեք, վախենում եմ: Նա հրաշքով ողջ է մնացել, կարողացել է դուրս փախչել արհեստագործական ուսումնարանից, երբ առաջին արկն է ընկել։ Ամենուրեք արյուն... Ընդհանուր առմամբ չորս զարկ է լսել։ Ինքը չի հասկանում, թե ինչպես է կարողացել փրկվել։ Իր գնդի տղաներից շատերը մահացել են, ոմանց մասին դեռ չգիտի զոհվե՞լ են, թե՞ ոչ»։
Ըստ ուկրաինական կողմի հաշվարկների, ամերիկյան HIMERS-ներով հասցված այդ հարվածներից ռուսական բանակում զոհվել է առնվազն 400 զինվոր, 300-ը՝ վիրավորվել։ Ռուսաստանի բարձրաստիճան ղեկավարությունը, այդ թվում նախագահ Պուտինը, առայժմ կատարվածին չի արձագանքել։
Մինչ այդ ռուսական բանակը շարունակում է գիշերային հարվածները՝ անօդաչուներով թիրախավորելով Կիևն ու ուկրաինական մյուս քաղաքները։
«Նրանք ոչ մի բանի առջև չեն կանգնի, մենք պետք է ամրապնդենք մեր պաշտպանունակությունը», - այս գիշեր հայտարարել է Ուկրաինայի նախագահ Զելենսկին։ - «Մենք պետք է տապալենք ռուսական սցենարը և պատրաստվում ենք դրան։ Ահաբեկիչները պետք է տանուլ տան, և նրանց հարձակման յուրաքանչյուր փորձ պետք է ձախողվի։ Դա կդառնա ահաբեկչական պետության վերջնական տապալումը։ Ես երախտապարտ եմ բոլոր դաշնակիցներին, որոնք հասկանում են դա։ Ռուսաստանը մոբիլիզացնում է մարդկանց, որ ուղարկի մահվան, մենք մոբիլիզացնում ենք քաղաքակիրթ աշխարհը՝ հանուն կյանքի»։
Պայթյուններ այսօր եղել են ոչ միայն Ուկրաինայի տարածքում, այլև բռնակցված Ղրիմում և Ռուսաստանի տարածքում։ Ղրիմում այսօր առավոտյան երկու անօդաչու թռչող սարք է խոցվել Բելբեկ ռազմական օդանավակայանի մոտակայքում։ Գիշերը պայթյունի մասին տեղեկություններ են ստացվել Դոնի Ռոստովից. հակաօդային պաշտպանության համակարգերը Ռոստովի մարզի երկնքում անհայտ օբյեկտ են խոցել։ Ռոստովի մարզի նահանգապետը հայտարարել է, որ իրավիճակը «վերահսկվում է» և կոչ է արել մարդկանց խուճապի չմատնվել:
Մինչ պատերազմը շարունակվում է, Միացյալ Նահանգները կրկին հայտարարել է, որ կաջակցի Կիևին այնքան, ինչքան անհրաժեշտ կլինի։ Պետքարտուղարության խոսնակը միաժամանակ ընդգծել է, որ ճգնաժամը հանգուցալուծելու հիմնական պատասխանատուն նստած է Կրեմլում. - «Մենք Ուկրաինայի կողքին կլինենք այնքան ժամանակ, որքան կպահանջվի: Ինչպես արդեն ասել ենք, նախագահ Պուտինը կարող է վերջ տալ այս պատերազմին հենց այսօր: Մենք կոչ ենք անում Ռուսաստանին դադարեցնել հարձակումները, դուրս բերել զորքերը Ուկրաինայից և 2023-ը դարձնել խաղաղության տարի»։
Մոկսվան սակայն խաղաղության գնալու որևէ նշան առայժմ ցույց չի տալիս։ Փոխարենը Պուտինը մշակույթի նախարարությանը հանձնարարել է «հատուկ ռազմական օպերացիային» նվիրված վավերագրական ֆիլմեր ցուցադրել երկրի կինոթատրոններում։ Այս հանձնարարականը հրապարակվել է Կրեմլի պաշտոնական կայքում։ Ըստ այդմ, առաջիկա մեկ ամսում Մշակույթի նախարարությունը պետք է առաջարկներ ներկայացնի ռուսական վավերագրական ֆիլմերի ցուցադրությունն ապահովելու համար։