Պեսկովը հերքում է Ուկիաինայի ԱԽ քարտուղարի պնդումը, թե Մոսկվան փորձում է առաջ տանել «կորեական» սցենարը
«Ռուսները շրջափակել են Սոկեդարի կեսը, բայց մենք դիմակայում ենք», - ասում է Սոլեդարի բնակիչը։
Բախմուտի և Սոլեդարի շրջաններում կատաղի մարտերի մասին երեկ երեկոյան իր ուղերձում հայտնել էր նաև նախագահ Զելենսկին՝ նշելով, որ այդ ճակատ լրացուցիչ ստորաբաժանումների կտեղափոխեն. - «Բախմուտը դիմանում է, անկախ ամեն ինչից: Եվ չնայած քաղաքի մեծ մասն ավերվել է ռուսական հարվածներից, մեր զինվորներն այնտեղ հետ են մղում ռուսական հարձակման մշտական փորձերը: Սոլեդարը դիմանում է, թեև ավելի շատ ավերածություններ կան»։
Մինչև այդ Ռուսաստանի պաշտպանության նախարարությունը հայտարարել էր, թե հունվարի 8-ի գիշերը ռուսական բանակը թիրախավորել է Կրատամատորսկ քաղաքում տեղակյաված երկու հանրակացարան, որտեղ հազար երեք հարյուրից ավելի ուկրաինացի զինվորկաններ էին տեղակայված։ Ըստ ռուսական կողմի, զոհվել է շուրջ 600 ուկրաինացի. - «Կիևի վարչակազմի կողմից Ամանորի գիշերը Դոնեցկում ռուսական զորամիավորումների տեղակայման վայրին հասված հանցավոր հարվածին ի պատասխան, ռուսական միացյալ ուժերի հրամանատարության կողմից իրականացվել է «Հատուցում» գործողությունը»։
Պաշտոնական Կիևն ու Ուկրաինայում աշխատող արևմտյան լրատվամիջոցները հերքում են ռուսների այս տեղեկությունը։ «Ռոյթերզի» թղթակիցն այցելել է դեպքի վայր, տեղացիները պատմել են, որ պայթյուններ, այո, եղել են, բայց միայն շենքի պատուհաններն են տուժել. - «Մի պայթյուն էր, հետո մյուսը եղավ։ Պատուհանները ցնցեց, բայց իրականում դրանից ավելի բան չկա, որ ասեմ։ Սովորական օր էր»։
Այս հաղորդումները Ռուսաստանի իշխանություններին ուղղված բազմաթիվ հարցեր են բարձրացրել։ Ռազմական փորձագետներից շատերն են համացանցում քննադատում հրամանատարությանն ու պնդում, որ վերնախավը պետք է պատասխանատվության կանչի նրանց։ Կրեմլում, սակայն, անդրդվելի են։ Նախագահ Պուտինի խոսնակը այսօր հայտարարել է, թե նախագահականում լիովին վստահում են Պաշտպանության նախարարության տված տեղեկություններին. - «Ուզում եմ հիշեցնել նախագահի խոսքը՝ ռազմական օպերացիայի մասին հիմնական, լեգիտիմ և լիարժեք տեղեկատվության աղբյուրը Պաշտպանության նախարարությունն է»։
Արդեն մեկ տարի չդադարող պատերազմի ֆոնին Արևմուտքը՝ Ֆրանսիան, Գերմանիան ու Միացյալ Նահանգները խոստանում են հավելյալ ռազմական օգնություն տրամադրել Ուկրաինային։ Բրիտանական SKYnews-ը, հղում անելով իր աղբյուրներին, հաղորդում է, թե Լոնդոնը քննարկում է նաև հրասայլեր ուղարկելու հնարավորությունը։
Կրեմլը շարունակում է պնդել, որ այս քայլերը միայն կխորացնեն հակամարտությունն ու ուկրաինական կողմի տառապանքները։ Խոսելով դիվանագիտական կարգավորման մասին՝ Ուկրաինայի անվտանգության խորհրդի քարտուղարը նախօրեին հայտարարել էր, թե Ռուսաստանը փորձում է առաջ տանել «կորեական» սցենարը, որով երկրորդ համաշխարհայինից հետո թերակղզին 38-րդ հյուսիսային զուգահեռականով բաժանվել էր երկու մասի։ Կրեմլի խոսնակն այսօր հերքել է այս տեղեկությունը։
Կիևն իր հերթին շարունակում է պնդել, թե պատերազմը կավարտվի միայն այն դեպքում, երբ ռուսները դուրս գան Ուկրաինայի ողջ տարածքից, այդ թվում Ղրիմից։
Ուկրաինայի նախագահի գրասենյակի խորհրդական Միխայիլ Պոդոլյակը ազգային հեռուստամարաթոնի եթերում ասել է, թե Ղրիմի ազատագրումը ժամանակի հարց է. - «Եթե մենք ազատագրենք Լուգանսկի, Դոնեցկի կամ Զապորոժիեի շրջանների տարածքը, ապա Ղրիմը կհայտնվի Ուկրաինայի տոտալ կրակային հսկողության տակ: Ես այնքան էլ չեմ հասկանում, թե ռուսներն ինչ պետք է անեն այդ ժամանակ: Նրանց այլ բան չի մնա, քան փախչել թերակղզուց»։
Մինչ Ուկրաինայի իշխանությունները հայտարարում են, թե ազատագրելու են իրենց տարածքն ամբողջությամբ, ռուսական ուժերը պատրաստվում են նոր զանգավածայաին հրթիռակոծության։ Ուկրաինայի զինված ուժերի գլխավոր շտաբը այսօր նախազգուշացրել է քաղաքացիներին ենթակառուցվածքային օբյեկտների վրա ռուսական զանգվածային հրթիռային հարձակման հնարավորության մասին։ Վերջին նման հարվածը հասցվել է Ամանորի նախաշեմին՝ միլիոնավոր մարդկանց զրկելով էլեկտրաէներգիայից ու ջեռուցումից։