Ուկրաինայի խորհրդարանում շրջանառվում է սովետական տոները չեղարկելու օրինագիծը
Ուկրաինայի խորհրդարանում՝ Գերագույն ռադայում շրջանառության մեջ է դրվել օրինագիծ, որով պետք է չեղյալ հայտարարվեն մարտի 8-ի, մայիսի 1-ի և մայիսի 9-ի տոները:
Օրինագիծը հեղինակել են տարբեր խմբակցություններից մի խումբ պատգամավոր: Նրանք առաջարկում են մարտի 8-ի Կանանց միջազգային օրվա փոխարեն փետրվարի 25-ին՝ բանաստեղծուհի Լեսյա Ուկրաինկայի ծննդյան օրը, նշել Ուկրանուհու օրն, իսկ մարտի 9-ին նշել բանաստեղծ Տարաս Շևչենկոյի ծննդյան օրը:
Առաջարկվում է նաև չեղարկել մայիսի 1-ին Աշխատավորների օրը և մայիսի 9-ի Հաղթանակի օրը: Փոխարենն օրինագծի հեղինակների համոզմամբ, պետք է մայիսի 8-ը սահմանել որպես Հիշատակի և հաշտության օր, իսկ մայիսի երկրորդ կիրակին դարձնել Մոր օր:
Ուկրաինայում ռուսների հարձակումից հետո փոխել են Խորհրդային Միության և Ռուսաստանի հետ առնչություն ունեցող հարյուրավոր բնակավայրերի, փողոցների, այգիների անունները և ապամոնտաժել են մեծ թվով արձաններ ու հուշատախտակներ:
Բացատրական գրության մեջ օրինագծի հեղինակները նշել են, որ «տնտեսական կորուստներից խուսափելու համար պետք է վերացնել կոմունիստական մնացուկները»:
Առայժմ հայտնի չէ, թե երբ է Ուկրաինայի խորհրդարանը լիագումար նիստում քննարկելու այդ օրինագիծը: