Վրաստանի խորհրդարանական հանձնաժողովը հավանություն է տվել «օտարերկրյա գործակալների մասին օրենքի» վրա նախագահի վետոյի հաղթահարմանը
Վրաստանի խորհրդարանի իրավական հարցերի հանձնաժողովը հավանություն է տվել, այսպես կոչված, «օտարերկրյա գործակալների մասին օրենքի» վրա նախագահ Սալոմե Զուրաբիշվիլիի վետոյի հաղթահարմանը։
Նիստը հեռարձակվել է օրենսդիր մարմնի կայքում։
«Հանձնաժողովում վետոն հաղթահարված է, հետևաբար այս հարցը փակված է»,- ամփոփելով քվեարկության արդյունքները` ասել է իրավական հարցերի հանձնաժողովի ղեկավար Անրի Օխանաշվիլին։
Այսպիսով, վետոյի հարցը կուղարկվի մայիսի 28-ին կայանալիք լիագումար նիստին քննարկման։
Հանձնաժողովի նիստը տեղի է ունեցել ընդդիմության և իշխող «Վրացական երազանք՝ ժողովրդավարական Վրաստան» կուսակցության պատգամավորների միջև թեժ բանավեճերի ֆոնին։ Ընդդիմախոսները մեղադրում էին պետական պաշտոնյաներին, որ օրենքը ընդունելով նրանք փակում են երկրի եվրոպական ուղին, ինչին Օխանաշվիլին պատասխանել է, որ եթե Վրաստանը դառնա ԵՄ անդամ, ապա այս օրենքի կարիքն այլևս չի լինի, քանի որ Եվրամիությունում գործում է այլ իրավական դաշտ։