პროფკავშირმა დაიწყო უსაფრთხო შრომის შესახებ პეტიციაზე ხელმოწერების შეგროვება
პეტიციის მთავარი მოთხოვნა უსაფრთხო შრომის მარეგულირებელი კანონმდებლობისა და ქმედითი შრომის ინსპექციის შექმნაა. საქართველოს მთავრობამ შრომის უსაფრთხოების შესახებ კანონპროექტი 2017 წლის პირველ ივნისს წარადგინა პარლამენტში. კანონპროექტი გასული წლის დეკემბერში უნდა დამტკიცებულიყო, რაც დღემდე ვერ მოხერხდა. როგორც პროფკავშირში აცხადებენ, მიუხედავად იმისა, რომ აღნიშნული კანონპროექტი დასაქმებულთა უსაფრთხოების მინიმალურ სტანდარტებსაც ვერ უზრუნველყოფს, მისი განხილვა ჭიანურდება. საქართველოს გაერთიანებული პროფკავშირები კანონპროექტში არსებულ ხარვეზებზე ამახვილებენ ყურადღებას. მათი განცხადებით, კანონპროექტში არ არის გათვალისწინებული ისეთი მნიშვნელოვანი საკითხები, რომლებიც კანონმდებლობას ქმედითსა და შედეგზე ორიენტირებულს გახდის. პროფკავშირების მოთხოვნებს შორისაა, კანონმდებლობა გავრცელდეს ყველა დასაქმებულზე და არა მხოლოდ მძიმე, მავნე და საფრთხის შემცველ სამუშაოზე, რასაც დღეს არსებული კანონპროექტი ითვალისწინებს. გარდა ამისა, შრომის ინსპექტორებს, ბევრ შემთხვევაში, კვლავ არა აქვთ უპირობო დაშვება სამუშაო ადგილებზე იმ შემთხვევაშიც კი, თუ შრომის უსაფრთხოების სტანდარტების დარღვევაზე მათ უშუალოდ მიმართავენ დასაქმებულები. ხელმოწერების შეგროვების გადაწყვეტილება პროფკავშირმა მას შედეგ გადაწყვიტა, რაც 2 თებერვალს, ჟვანიას #10-ში მდებარე მშენებარე კორპუსიდან 26 წლის მუშა გადმოვარდა და დაიღუპა. პროფკავშირების მიერ გავრცელებული სტატისტიკური მონაცემების მიხედვით, 2017 წელს, უსაფრთხოების ნორმების დარღვევის გამო სამუშაო ადგილზე დაიღუპა 41 და დაშავდა 63 მუშა.