მეუფე ნიკოლოზი: ხატზე მთხვევას ვერავის ავუკრძალავთ, ნაკურთხი წყალი კორონავირუსისგან დაგიცავთ, ერთჯერადი კოვზი მიუღებელია

ღვინო ბუნებრივი ანტისეპტიკია და მასში გაწმენდილი კოვზი ბაქტერიებისგან თავისუფალია, - უთხრა ახალქალაქისა და კუმურდოს მიტროპოლიტმა, მეუფე ნიკოლოზმა ჟურნალისტებს კორონავირუსის გავრცელებასთან დაკავშირებულ საკითხებზე ლაპარაკისას. „რაც შეეხება ერთჯერად კოვზებს, ეს არის პრინციპულად არასწორი. იმიტომ რომ, გარდა იმისა, რომ ღვინო სისხლად გარდაიქცევა, გვჯერა, რომ ეს არის ქრისტეს სისხლი და ხორცი, რომელიც თვითონ წვავს ყველაფერს და განწმენდს ყველანაირ ავადმყოფობას“, - განაცხადა მეუფე ნიკოლოზმა.


მისივე თქმით, ეკლესია ვერ ეტყვის მრევლს, რომ ხატებს არ ემთხვიონ, რადგან „ეს ბევრად უფრო მძიმე ზიანი იქნება სულიერი ცხოვრებისთვის, ვიდრე კორონავირუსი“ და მორწმუნეებს მოუწოდა, პატრიარქის ლოცვა-კურთხევის მიხედვით, სახლს ნაკურთხი წყალი ასხურონ. „გააკეთეთ და არ მოგეკარებათ ეს კორონავირუსი“, - თქვა მიტროპოლიტმა.


მეუფე ნიკოლოზის განმარტებით, კორონავირუსის გავრცელებას სერიოზულად უნდა შევხედოთ, მაგრამ არც პანიკის ატეხვა იქნება სწორი. „ქართველებს გვაქვს ასეთი ანდაზა: დედის წინ მორბენალ კვიცს ან მგელი შეჭამს ან მგლის ფერი ძაღლიო. მგელი არის ეს კორონავირუსი და მგლისფერი ძაღლი არის პანიკა, რომელიც უფრო საშიშია, ვიდრე თვითონ კორონავირუსი, ამიტომ მოვუწოდებ მოსახლეობას, ნუ მიეცემით პანიკას“, - უთხრა ჟურნალისტებს ახალქალაქისა და კუმურდოს მიტროპოლიტმა, მეუფე ნიკოლოზმა.