ჩეხეთში კორონავირუსით ინფიცირებული პირველი პაციენტი გარდაიცვალა
კორონავირუსის წინააღმდეგ ბრძოლის საკოორდინაციო შტაბის ცნობით, 22 მარტისათვის ჩეხეთში მკურნალობას გადის კორონავირუსით ინფიცირებული 1047 პაციენტი. 7 კაცი უკვე განიკურნა.
ჩეხეთის ხელისუფლება აცხადებს, რომ კორონავირუსის გამო შემოღებული შეზღუდვები საზოგადოებრივი ჯანდაცვის უზრუნველსაყოფად, შესაძლოა, აპრილის შუა რიცხვებისათვის გაუქმდეს, თუ ქვეყანაში ამ დროისათვის 10 ათასს არ გადააჭარბებს კორონავირუსით დაავადებულთა რიცხვი, - განაცხადა ჩეხმა ეპიდემიოლოგმა, რომან პრიმულამ, რომელიც კორონავირუსის წინააღმდეგ ბრძოლის ჩეხეთის საკოორდინაციო შტაბს ხელმძღვანელობს.
რაც შეეხება მეზობელ ქვეყნებთან სასაზღვრო შეზღუდვებს, მისი ბედი დამოკიდებული იქნება იმაზე, თუ როგორ განვითარდება ერთ თვეში ვითარება კოორნავირუსის ეპიდემიის მხრივ მოსაზღვრე გერმანიაში, ავსტრიაში, პოლონეთსა და სლოვაკეთში.