19 წლის ფეხბურთელს მესამე დღეა ეძებენ, საქმე თავისუფლების უკანონოდ აღკვეთის მუხლითაა აღძრული
როგორც რადიო თავისუფლებას უთხრეს შინაგან საქმეთა სამინისტროში, გამოძიება დაწყებულია სისხლის სამართლის კოდექსის 143-ე მუხლით, რაც თავისუფლების უკანონო აღკვეთას გულისხმობს, მიმდინარეობს საგამოძიებო და სამძებრო ღონისძიებები. დამატებით განმარტებებს უწყებაში, ამ ეტაპზე, არ აკეთებენ.
მედიაში გავრცელებული ინფორმაციის თანახმად, საქმე შესაძლოა უკავშირდებოდეს 19 ივნისს, მცხეთაში მდებარე ერთ-ერთ აგარაკზე, ახალგაზრდებს შორის დაწყებულ დაპირისპირებას. ამავე ინფორმაციით, 19 წლის ფეხბურთელის კვალი, მდინარე არაგვის ნაპირზე იკარგება, სადაც მაშველებმა მისი ჩანთა იპოვეს.
სამძებრო სამუშაოებში ჩართულია 70 მეხანძრე-მაშველი, მათ შორის, მყვინთავთა ჯგუფი 7 გასაბერი ნავით.
19 ივნისს, დაახლოებით 11 საათზე გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა. განცხადება გაავრცელა "საბურთალოს" აკადემიამაც.
შსს-ს ცნობით, პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები. 20 ივნისს მიღებულ იქნა გადაწყვეტილება ზაჰესის დამბის გახსნისა და ჟინვალჰესის დამბის დაკეტვის შესახებ, რამაც გამოიწვია მდინარე არაგვში წყლის დონის დაწევა.