რუმინეთის პროდასავლელი პრემიერი გადადგა არჩევნებში მიღებული იმედგამაცრუებელი შედეგის ფონზე
ორბანი ამ განცხადებით გამოვიდა 7 დეკემბრის საღამოს, მას შემდეგ, რაც ცხადი გახდა მემარცხენე ოპოზიციის მოსალოდნელზე მაღალი შედეგი არჩევნებზე, რომელზეც ამომრჩევლის აქტივობა დაბალი იყო, ნაწილობრივ კორონავირუსის პანდემიის გამო.
ხმების 95 პროცენტის დათვლის შემდეგ, პოპულისტმა და წარსულში კორუფციისკენ მიდრეკილმა სოციალ-დემოკრატებმა (PSD) - რომლებიც რუმინეთის პოლიტიკაში კომუნიზმის დანგრევის შემდეგ წამყვან ძალას წარმოადგენდნენ - 30 პროცენტი მიიღეს, რეფორმატორმა ეროვნულმა ლიბერალებმა კი დაახლოებით 5 პროცენტით ნაკლები.
პირდაპირ სატელევიზიო ეთერში გადაცემულ გამოსვლაში ორბანმა, რომლის მთავრობას ოპონენტები კორონავირუსის პანდემიასთან არასათანადოდ გამკლავების გამო აკრიტიკებდნენ, განაცხადა, რომ პოსტს ტოვებს და იცის, რომ თავისი მოვალეობა შესრულებული აქვს.
პრეზიდენტმა კლაუს იოჰანისმა პარლამენტში მოხვედრილ პარტიებთან კონსულტაციები უნდა გამართოს ახალი პრემიერ-მინისტრის შესარჩევად. სოციალ-დემოკრატებს ახალ პარლამენტში მოკავშირეების ნაკლებობა ექნებათ და იოჰანისმა 7 დეკემბერს განაცხადა, რომ ეს პარტია "პოლიტიკური გადაწყვეტილებების მიღების პროცესისგან გარეთ დარჩება".