ცხინვალში აქციის მოსალოდნელი დარბევის შესახებ ცნობას უარყოფს დე ფაქტო შსს
„ჩვენ ამის შესახებ, სამართალდამცავ ორგანოებში მომუშავე ნაცნობებისგან გავიგეთ. გვითხრეს, რომ ძალისმიერი მეთოდებით საპროტესტო აქციის დაშლის დარბევის ბრძანება მიიღეს“. ინფორმაცია სოციალური ქსელებითაც სწრაფად გავრცელდა. ცხინვალელმა კომენტატორებმა კი ადგილობრივ მილიციას აქციის მონაწილეების დარბევისგან თავშეკავებისკენ მოუწოდეს.
დე ფაქტო შინაგან საქმეთა სამინისტრომ კი სპეციალური განცხადება გაავრცელა, სადაც ნათქვამია: „სოციალური ქსელებით გავრცელდა ხმები, რომ თითქოს სამართალდამცავი ორგანოების წარმომადგენლები ემზადებიან აქციის მონაწილეების დასაშლელად, ეს ინფორმაცია არ შეესაბამება სიმართლეს და მოსახლეობას მოვუწოდებთ არ აჰყვეს პროვოკაციას“.
მანამდე აქციის მონაწილეები დე ფაქტო შინაგან საქმეთა მინისტრის მოვალეობის შემსრულებელმა ფუხაევმა გააფრთხილა, რომ საპროტესტო აქცია არასანქცირებული იყო და როგორც ადმინისტრაციულ, ასევე სისხლის სამართლის დანაშაულის პასუხისმგებლობას ითვალისწინებდა. მილიციელებთან შელაპარაკების გამო, მოკლული ინალ ჯაბიევის ძმის, აცამაზ ჯაბიევის მიმართ ძებნაც გამოცხადდა.
4 დეკემბრიდან ოკუპირებულ ცხინვალში პერმანენტული საპროტესტო აქციები მიმდინარეობს. აქციის ორგანიზატორები არიან ცხინვალელი მილიციელების მიერ მოკლული ინალ ჯაბიევის ოჯახის წევრები. მოედანზე ჯაბიევის ცოლი და ახლო ნათესავები, 3 დღეა, იკრიბებიან და მათი მოთხოვნები უცვლელია: ინალ ჯაბიევის მკვლელობის სამართლიანი გამოძიება და იმ პირთა უმკაცრესად დასჯა, ვინც ამ დანაშაულის შემსრულებელი და თანამონაწილეა. ჯაბიევის ნათესავები ღამეებს თეატრალურ მოედანზე ათენებენ. 30 წლის ინალ ჯაბიევი 2020 წლის 28 აგვისტოს გარდაიცვალა ცხინვალის დროებითი იზოლატორიდან საავადმყოფოში მიყვანამდე. ჯაბიევი ეჭვმიტანილი იყო დე ფაქტო შს მინისტრ იგორ ნანიევის ავტომანქანაზე 17 აგვისტოს განხორციელებულ შეიარაღებულ თავდასხმაში. ინფორმაციას, რომ ინალ ჯაბიევის სიკვდილი, სავარაუდოდ, გამოიწვია იზოლატორში მისმა ცემამ და წამებამ, საპროტესტო აქციები მოჰყვა. მასობრივი მღელვარების გამო გადადგა დე ფაქტო მთავრობა, ადგილობრივი „მილიციის“ რამდენიმე თანამშრომელი პასუხისგებაში მისცეს, თუმცა თანამდებობა შეინარჩუნა დე ფაქტო გენერალურმა პროკურორმა ურუზმაგ ჯაგაევმა. მის გადადგომას ამ დრომდე მოითხოვს ე.წ. პარლამენტის წევრთა უმრავლესობა. გასული კვირის ბოლოს, ინალ ჯაბიევის ოჯახის ორგანიზებით, ცხინვალის ცენტრში დაიწყო საპროტესტო აქცია სამართლიანი გამოძიებისა და მკვლელობის თანამონაწილეთა დასჯის მოთხოვნით.