ჰელსინკის ჯგუფი საუბრობს "რუსეთში ადამიანის უფლებების მხრივ საგანგებო მდგომარეობაზე"
უფლებადამცველები აცხადებენ, რომ ბოლო წლების განმავლობაში ქვეყანაში სულ უფრო მეტად უარესდება კანონების დაცვის მხრივ ვითარება, სასამართლოს და უფლებადამცველი სისტემების მდგომარეობა. მათი თქმით, ხელისუფლების ქცევა აჩვენებს, რომ ის არ არის მზად საზოგადოებას თანასწორივით ესაუბროს, მუდმივად იჭრდება სამოქალაქო და პოლიტიკური თავისუფლებების სფეროში და ავიწროებს სივრცეს კრიტიკისთვის და ნებისმიერი ალტერნატიული მოსაზრებისთვის.
ჰელსინკის ჯგუფის თანამშრომლები რესურსების გათვალისწინებით იცავენ მოქალაქეებს და სახელმწიფოს თავისი მოვალეობების შესრულებისკენ მოუწოდებენ, მაგრამ "2020-მა წელმა ვითარება თვისებრივად შეცვალა და ეს სამუშაოც მნიშვნელოვნად გაართულა".
უფლებადამცველი ჯგუფის თქმით, წელიწადი დაიწყო "კონსტიტუციის უკანონო გადაწერით, პოლიტიკური და სამოქალაქო აქტივისტების დევნის პრაქტიკის გაძლიერებით, და მთავრდება ალექსეი ნავალნის სიცოცხლეზე თავდასხმის საჭირო გამოძიების დემონსტრაციული არარსებობით და საკანონმდებლო ინიციატივების საშემოდგომო პაკეტით, რომლებიც მიმართულია დამოუკიდებელი მოქმედებების შეზღუდვაზე არა მხოლოდ არაკომერციული ორგანიზაციებისთვის, არამედ საგანმანათლებლო დაწესებულებებისთვის და ფიზიკური პირებისთვისაც კი".
სხვა საკითხებთან ერთად, განცხადებაში ნათქვამია, რომ "ხელისუფლების მხრიდან რეპრესიულ მეთოდებზე დაყრდნობამ მოიტანა ძალოვანი სტრუქტურების გავლენის გაფართოება და დაუსჯელობა".
"რუსეთის ყველა მოქალაქეს მოვუწოდებთ ხელისუფლებას მოთხოვონ არა დეკლარაციული, არამედ რეალური სამართლებრივი სახელმწიფოს მშენებლობა, როცა ყველა ჩვენგანს ეცოდინება, რას უნდა ელოდეს კანონის, პოლიციელის, მოსამართლისგან. რეალურად ძლიერი სამოქალაქო საზოგადოება ვერ გავხდებით, სანამ ერთობლივი ძალებით არ დავიწყებთ მთავრობისგან თანასწორუფლებიანი დიალოგის მოთხოვნას" - ასკვნიან რუსეთში მოქმედი უძველესი უფლებადამცველი ორგანიზაციის წევრები.