ხაზარაძე არჩევნების 2022 წელს გამართვის შესახებ: ესაა ვერსია, რომელიც მსჯელობას საჭიროებს და არა თავდასხმას
„მე ძალიან მკაფიოდ ვთქვი, რომ აქ არის ლაპარაკი სრულად პროპორციულ არჩევნებზე 2022-ში. ეს არის ძალიან დიდი განსხვავება იმასთან მიმართებაში, რაც ითქვა და როგორც გაჟღერდა. დღეს ჩვენ ვითხოვთ ახალ არჩევნებს და ამ მოთხოვნას არაფერი წინ არ უდგას“, - განაცხადა მამუკა ხაზარაძემ TV პირველის ეთერში. გადაცემაში მან აღნიშნა, რომ ეს არის მისი პოზიცია, ერთ-ერთი ვერსია, რომელიც საჭიროებს ფიქრს და მსჯელობას და არა თავდასხმას:
„კიდევ ვიმეორებ, ქვეყნისთვის მნიშვნელოვანია სრულად პროპორციული არჩევნები, მაგრამ ეს არის ნაბიჯი მეორე. თუ გაიხსენებთ, პლებისციტსაც უამრავი წინააღმდეგი და მომხრე ჰყავდა, რად გვინდა პლებისციტი, პირდაპირ მოვითხოვოთ რიგგარეშე არჩევნები ხო? ყველაფერი, ეს გზები არის იმისათვის გასააზრებელი, რომ საბოლოო ჯამში ქვეყანა მდგომარეობიდან გამოვიყვანოთ. ამიტომ მარტო ამაზე ვისაუბროთ და სხვა თემაზე ტაბუ იქნას დადებული, რანაირი იდეაც არ უნდა იყოს იმიტომ, რომ ვიღაცას ეს არ მოსწონს, ამის კატეგორიული წინააღმდეგი ვარ. თავისუფალი ადამიანი ვარ, ვფიქრობ გამოსავალზე და ამას ხმამაღლა ვთავაზობ ჩემს ამომრჩეველსაც ვთავაზობ პარტნიორებსაც ოპოზიციიდან“, - განაცხადა მამუკა ხაზარაძემ. მან 27 დეკემბერს „მთავარი არხის“ ეთერში განაცხადა, რომ რიგგარეშე არჩევნებს ქვეყანაში შექმნილი მდგომარეობა ითხოვს.
"მე დარწმუნებული ვარ, რომ მოლაპარაკება შედგება და რიგგარეშე არჩევნები დაინიშნება. იდეალურია, რომ 2021-ში მოხდეს ეს ყველაფერი, რისიც მე არ მჯერა, მაგრამ მე მგონია, რომ 2022-ში შესაძლებელია სრულად პროპორციული არჩევნები... ეს სხვა პარტიებმა და ოპოზიციამაც უნდა გაიზიაროს... ჩემი აზრია, რომ 2022-ში უნდა დაინიშნოს რიგგარეშე არჩევნები სრული პროპორციული და იქიდან უნდა დაიწყო ახალი 4 წლის ათვლა", - თქვა ხაზარაძემ.
ეს ერთ-ერთი პირველი შემთხვევაა, როცა ოპოზიცია რიგგარეშე არჩევნების ჩატარების თარიღად 2022 წელს ასახელებს. ოპოზიცია რიგგარეშე არჩევნების მოთხოვნით ამ დრომდე უარს ამბობს საპარლამენტო მანდატებზე და არ შედის პარლამენტში.