კულტურის სამინისტრო ლევილის მამულიდან გავრცელებულ კადრებს ეხმიანება
საქართველოს კულტურის, სპორტისა და ახალგაზრდობის სამინისტრო საზოგადოების შეცდომაში შეყვანის მცდელობად აფასებს სოციალურ ქსელში გავრცელებულ ვიდეოკადრებს საფრანგეთიდან, ლევილის მამულიდან. მოქალაქე ვახტანგ ბარამაშვილმა ფეისბუკზე გაავრცელა ვიდეო და ამბობდა, რომ განადგურებულია მნიშვნელოვანი მასალა.
"როგორი რეაბილიტირებულია ხედავთ. ეს არის 70 წლის განმავლობაში გამოცემული, წიგნები, ჟურნალები. არის ხელნაწერები, ერთმანეთთან მიმოწერები. იმასაც ვერ იფიქრებ, რომ რაღაც ნაწილი წაღებულია. როგორც დაალაგეს თავის დროზე თაროზე, ისევ ისე დევს. არც გამოკვლეულია, არც დასკანერებულია - საქართველოს უახლოესი ისტორიაა და ეს ყველაფერი უბრალოდ ყრია და ლპება. ფოტოებია ბევრი, ფირებია კიდევ. აი ასეთ მდგომარეობაშია ლევილი ახლა", - ამბობდა ვიდეოში ვახტანგ ბარამაშვილი.
სამინისტროში აცხადებენ, რომ სხვენში წლების განმავლობაში ჩადიოდა წყალი და აზიანედა არამატო იმ სივრცეს, არამედ შატოსაც. გავრცელებული განცხადების მიხედვით, 2022 წლის ნოემბერში სამინისტრომ სხვენის სახურავი შეაკეთა, რომ 2023 წელს, როცა უკვე საფრანგეთის კანონმდებლობით გათვალისწინებული პროცედურები დასრულდება და მათ სრული რეაბილიტაციის შესაძლებლობა ჰქონდეთ.
"სინამდვილეში, სამინისტროს თანამშრომლებმა დაასრულეს მამულის სხვადასხვა სივრცეში ინვენტარიზაციის პროცესი და დაიწყეს შატოს სხვენში არსებული საარქივო მასალების, რომლებიც ათეული წლებია იქ ინახებოდა შატოს ყოფილი მფლობელების მიერ, ეტაპობრივი დახარისხება მათი სამომავლოდ ბიბლიოთეკაში განთავსების მიზნით. სხვენში ამჟამად დარჩენილია ქართული პერიოდული გამოცემების ნაწილი, რომელთაგან თითოეულის სამ-სამი ეგზემპლარი უკვე გადატანილია მამულის ბიბლიოთეკაში", - წერია განცხადებაში.
ამავე განცხადებაში საუბარია უკვე გაკეთებულ და გასაკეთებელ სამუშაოებზე:
"2023 წელს დაგეგმილია სხვენის, ისევე, როგორც შატოს სხვა ნაწილების დაცლა სამუშაოების დაწყებამდე და შენობის გაწმენდა აზბესტისაგან";
"2022 წლის ნოემბერში, ლევილის მამულის გუშაგის სახლში (საქართველოს მთავრობის 2022 წლის 4 ნოემბრის #2022 განკარგულება) სარემონტო-სარეაბილიტაციო სამუშაოები დაიწყო, რაც 2023 წლის პირველ ნახევარში დასრულდება. ხელშეკრულების ღირებულებაა 251 895,74 ევრო";
"პარალელურად მიმდინარეობს მამულის დაზიანებული გალავნის რეაბილიტაცია... გალავანზე სამუშაოები დაიწყო 2022 წლის 29 ნოემბერს და 2023 წლის მარტამდე რეაბილიტირდება გალავნის ისტორიული ნაწილი, 1053 მ2 ფართობით. აღნიშნული სამუშაოების ჯამური ღირებულებაა 376 694,56 ევრო";
"რაც შეეხება შატო-მედიათეკა-ბიბლიოთეკა-აკადემიას, სარეაბილიტაციო სამუშაოების განმახორციელებელი კომპანიის შესარჩევად, საფრანგეთის კანონმდებლობით გათვალისწინებული პროცედურების შესაბამისად, მიმდინარეობს საპროექტო განაცხადის დაზუსტება; პროექტი კი განხორციელდება რამდენიმე ფაზად";
"რაც შეეხება მამულის პარკს, 2022 წლის სექტემბერში სამინისტრომ ლევილის მამულის მწვანე საფარის მოწესრიგებისა და სანიტარული ჭრის სამუშაოები დაიწყო, რომლებიც 30 წლის მანძილზე არ ჩატარებულა. მამულის პარკში (3.09ჰა) მიმდინარე სამუშაოები, მცენარეთა თავისებურებებიდან გამომდინარე, რამდენიმე ეტაპად წარიმართა და დეკემბერში დასრულდა";
"2023 წლიდან, მწვანე სივრცეების მოვლის მიზნით, იგეგმება თანამშრომლობის გაგრძელება ფრანგულ კომპანია “Scop Val’Emploi“-სთან, რომელიც 2023 წლის მანძილზე უზრუნველყოფს რამდენიმე რეგულარულ ჩარევას მამულის ტერიტორიაზე";
კულტურის სამინისტრო ლევილის მამულთან დაკავშირებით განცხადების გავრცელება 2022 წლის მაისშიც მოუწია, როცა მოქალაქე ანი კალმახელიძემ სოციალურ ქსელში ფოტოები გამოაქვეყნა.
"როგორც ფოტოებზე ხედავთ, სრულიად გაჩანაგებულია ყველაფერი. ეს ისტორიული სახლი, უბრალოდ ნაწილებად იშლება და ეზოს სარეველა ფარავს", - წერდა ის.
სამინისტროში მაშინ თქვეს, რომ გავრცელებული ფოტოები არ ასახავდა შატოს იმჟამინდელ მდგომარეობას.
ლევილის მამული, რომელიც პარიზიდან 37 კილომეტრში მდებარეობს და 45 ათას კვადრატულ მეტრ ფართობს მოიცავს საქართველოს 2016 წელს გადაეცა. დღევანდელი კულტურის მინისტრი თეა წულუკიანი მაშინ იუსტიციის მინისტრი იყო.
"1920-იან წლებში სწორედ სახელმწიფოს ხალხის ფულით ნოე რამიშვილის, ნოე ჟორდანიას, ექვთიმე თაყაიშვილის და ჩვენი სხვა წინაპრების მიერ შეძენილ იქნა ეს მამული და შატო, საიდანაც ისინი საქართველოს თავისუფლებისთვის ბრძოლას აგრძელებდნენ", - თქვა მაშინ მან.
საქართველოს მთავრობის 2016 წლის 21 ივლისის განკარგულებით ლევილის მამულში საჭირო სამუშაოებისთვის 5 მილიონი ევრო დამტკიცდა. ამ დოკუმენტის მიხედვით, სამუშაოები 2017-2026 წლებში უნდა ჩატარდეს.