ბრეგაძის თქმით, ევროსასამართლოს თანახმად, 2012 წლის შემდეგ  გაბედეს პატიმრებმა საუბარი

აკაკი ოჩიგავას საქმეზე ევროსასამართლოს მიერ მიღებულ გადაწყვეტილებას „ფეისბუკის" პოსტით გამოეხმაურა საქართველოს იუსტიციის მინისტრი რატი ბრეგაძე. ოჩიგავა, რომელიც 2011 წლიდან 2014 წლამდე სასჯელს იხდიდა გლდანის პენიტენციურ დაწესებულებაში, წამებისა და არაადამიანური მოპყრობის მსხვერპლი იყო. საქმე ეხება „ნაციონალური მოძრაობის" ხელისუფლებაში ყოფნის პერიოდს. 

ბრეგაძემ გამოაქვეყნა ფრაგმენტები სტრასბურგის სასამართლოს გადაწყვეტილებიდან. 

„პატიმრების მორჩილებისა და ციხის ადმინისტრაციასთან თანამშრომლობის მიზნით:

 ახლად მოთავსებულ პატიმართა აუცილებლად ცემის პრაქტიკა – ე.წ. საკარანტინო პროცედურა;

პატიმრების სისტემატური ცემა კვირაში რამდენიმეჯერ;

ე.წ. კარცერსა და მცირე ზომის სამარტოო საკნებში დასჯის მიზნით ხანგრძლივი ვადით მოთავსება, სადაც მეტალის საწოლის გარდა არაფერი იყო და დღის განმავლობაში პატიმრებს უწევდათ ცემენტის იატაკზე ჯდომა. საწოლი აკეცილი და მიმაგრებული იყო კედელზე საკეტით. დაწესებულების თანამშრომლები საწოლს ხსნიდნენ და მომჩივანს ნებას რთავდნენ, გამოეყენებინა მხოლოდ საღამოს 10 საათიდან დილის 8 საათამდე;

პატიმრებს, ასევე, უწევდათ საკანში ერთდროულად რამდენიმე პატიმრის მოთავსების შემთხვევაში მთელი დროის განმავლობაში ფეხზე დგომა;

პატიმრებისთვის საკვების მიღებისა და საპირფარეშოს გამოყენების შეზღუდვა;

ოჯახის წევრებთან შეხვედრის გამუდმებით შეზღუდვა;

პატიმრებისთვის სპეციალური სახის ჩაფხუტის ჩამოფარება და პირში ბურთის ჩაჩრა, რათა მათ არ ესაუბრათ;

პატიმრებს შორის საუბარი მხოლოდ ჩურჩულით.

ეს სამწუხარო და დიდი ადამიანური ტკივილით გაჯერებული სიტყვების ერთობლიობა არა რომელიმე ნაწარმოების ან საშინელებათა ჟანრის ფილმიდან, არამედ ევროპული სამართლიანობის უმაღლესი ინსტანციის, სტრასბურგის სასამართლოს გადაწყვეტილებიდანაა. ევროპულ სახელმწიფოში ადამიანის უფლებრივი მდგომარეობის უმაღლესი სამართლებრივი შემფასებლის უაპელაციო ბეჭდით დადასტურებული ტრაგიკული ქრონიკა 2012 წლამდე ჩვენი ქვეყნის ციხეებში არსებული რეალობაა", - დაწერა რატი ბრეგაძემ. 

როგორც იუსტიციის მინისტრი აღნიშნავს, გადაწყვეტილებაში ასევე აღნიშნულია, რომ მხოლოდ 2012 წელს, მთავრობის ცვლილების შემდეგ, გაბედეს პატიმრებმა საუბარი მას შემდეგ გახდა შესაძლებელი დარღვევებზე რეაგირება.

„რაოდენ პარადოქსალურიც არ უნდა იყოს მავანი მაინც არ ისვენებს და დამარცხებული, მწამებლებზე დამყარებული, რეჟიმის რეჟისორები და მთავარი მოქმედი პირები დღეს უსირცხვილოდ ცდილობენ „უფლებადამცველების“, „დემოკრატიის მცველებისა“ და „პროევროპელების“ ტყავში ფარისევლურად გახვეულებმა „დამოძღვრონ“ ქვეყანა. დროა მათ სარკეში დიდ ხანს უყურონ საკუთარ თვალებს, მოინანიონ ტერორი და ბოდიში მოიხადონ, რაც უმაღლესი სუვერენის-ქართველი ხალხის გამოხატული ნებაა!" - აცხადებს ბრეგაძე.

მინისტრი აღნიშნავს, რომ დღეს სახელმწიფო მაქსიმუმს აკეთებს პენიტენციურ დაწესებულებებში მყოფი პირების ყველა უფლების დასაცავად.

„დღეს კი ყველა პატიმარმა და მისმა ახლობელმა უნდა იცოდეს, რომ სასჯელს ყველა ღირსეულ პირობებში მოიხდის და არავინ გაიგებს ჯალათის ხმას! სახელმწიფო მაქსიმუმს აკეთებს პენიტენციურ დაწესებულებებში მყოფი პირების ყველა უფლების დასაცავად და ამისთვის მადლობა ჩვენს ღირსეულ, ადამიანური თვისებებით უხვად დაჯილდოებულ ოფიცრებს!" - ნათქვამია რატი ბრეგაძის პოსტში. 

გადაწყვეტილებაში, რომელიც გუშინ, 2023 წლის 16 თებერვალს გახდა ცნობილი და საქართველოს ხელისუფლებას 20 000 ევროს ოდენობის კომპენსაციის გადახდა დაეკისრა, ასევე საუბარია, რომ დანაშაული სახელმწიფომ ეფექტიანად არ გამოიძია.