რუსმა სამხედროებმა საარტილერიო ცეცხლი გაუხსნეს ხერსონს. დაიჭრა რამდენიმე ადამიანი
შაბათს, 25 თებერვალს, რუსეთის არმიამ კვლავ გახსნა საარტილერიო ცეცხლი ქალაქ ხერსონის მიმართულებით, რის შედეგადაც რამდენიმე მაშველი დაიჭრა.
"საარტილერიო ცეცხლის შედეგად ხერსონის სამხარეო საავარიო-სამაშველო სამსახურის ორი თანამშრომელი დაიჭრა. ისინი ხერსონში, პოლტავის ქუჩაზე ფანჯრებზე ფიცრების აკვრით იყვნენ დაკავებული, როდესაც მტრის მხრიდან ახალი დარტყმა განხორციელდა", - ნათქვამია ადგილობრივი ადმინისტრაციის მიერ ტელეგრამის არხით გავრცელებულ ცნობაში.
მაშველები, რომლებსაც ჭრილობები ჭურვის ნამსხვრევებისგან აქვთ მიღებული, საავადმყოფოში გადაიყვანეს.
იმავდროულად, უკრაინის პრეზიდენტის ოფისის ხელმძღვანელი ანდრი ერმაკი იუწყება, რომ რუსეთის დაბომბვის გამო საავადმყოფოში მოხვდა სამი ადგილობრივი მცხოვრები.