მიხეილ სარჯველაძე: გამოძიება თუ იქნება საჭირო, ჩატარდება
სამწუხაროდ, საქართველოში მოიძებნებიან მათ შორის პოლიტიკური ძალები, რომელთათვის დღეს გამოძიების წარმოება და პოლიტიკური ხმალაობის ატეხვა უფრო მეტად მნიშვნელოვანი აღმოჩნდა, ვიდრე სამძებრო სამუშაოების ეფექტიანობა და ამ სამუშაოების მიმდინარეობა, – ასე უპასუხა ადამიანის უფლებათა კომიტეტის თავმჯდომარე, მიხეილ სარჯველაძემ კითხვას, უნდა დაიწყოს თუ არა რაჭაში მომხდარ სტიქიასთან დაკავშირებით გამოძიება.
ის ყველას მოუწოდებს, პირველ რიგში, საკითხების ირგვლივ სპეციალისტების შეფასებებს დაელოდონ.
„სამწუხაროა, მაგრამ ასეა. ეს ყველაფერი ჰგავს პირველივე დღეს გამართულ მიტინგს თუ აქციას. უბრალოდ, არ ვარგა წინმსწრებად ისეთი განცხადებების კეთება, რომელსაც პოლიტიკური ინტერესის და პოლიტიკური ქულების დაწერის მცდელობების ძალიან მყრალი სუნი ასდის. ჩემი მოწოდება იქნებოდა, პირველ რიგში, ყველა დააკვირდეს ამ საკითხების ირგვლივ სპეციალისტებს შეფასებებს, რა შეფასებაც იქნება, რასაკვირველია, გამოძიება თუ იქნება საჭირო, ჩატარდება. ეს ყველაფერი უნდა თქვას სპეციალისტების ჯგუფმა, რომელიც მომხდარ ინციდენტს შეისწავლის და აქედან გახდება ყველაფერი ცნობილი“, – განაცხადა სარჯველაძემ.
მისი თქმით, ეს იყო იმ სპეციფიკის და მასშტაბის კატასტროფა, რომლის წინასწარ პროგნოზირება შეუძლებელი იყო.
„ყველა საუბრობს იმაზე, რომ ეს არის იმ მასშტაბის და იმ სპეციფიკის კატასტროფა, რომლის წინასწარი პროგნოზირება პრაქტიკულად, შეუძლებელი იყო. ასეთია წინასწარი შეფასებები და დასკვნები, რომელიც კეთდება“, – განაცხადა სარჯველაძემ.
მან სამძიმარი გამოუცხადა გარდაცვლილთა ოჯახებს და მთელ საქართველოს. მიხეილ სარჯველაძის განმარტებით, ეს არის მთელი ერის ტრაგედია.
„მასშტაბიც არის გამაოგნებელი, შემაძრწუნებელი. უბრალოდ, წარმოდგენაც კი ძნელია, რა მასშტაბის კატასტროფასთან გვაქვს საქმე. მთელი ეს არანორმალური მასშტაბების მასა ჩამოვიდა, ვფიქრობ, ამ მასშტაბის კატასტროფა, ალბათ, იშვიათად შეიძლება სადმე ნანახი ან გაგონილი გვქონდეს“,-განაცხადა სარჯველაძემ.
მან განმარტა, რომ ყველა რესურსი არის გამოყენებული.
„ყველგან, სადაც ბუნებრივი, ფიზიკური მდგომარეობა იძლევა შესაძლებლობას, რომ მუშაობა მიმდინარეობდეს, საკმარისზე მეტი რესურსი არის მობილიზებული საიმისოდ, რომ ეს სამუშაოები მიმდინარეობს. გზადაგზა ჩნდება ახალი შესაძლებლობები, ახალი რესურსი არის მობილიზებული. ვფიქრობ, ამ კუთხით მუშაობა სრულფასოვნად მიმდინარეობს“,-განაცხადა სარჯველაძემ.
რაც შეეხება კითხავს, თქვა თუ არა საქართველომ სხვადასხვა ქვეყნების მხრიდან დახმარებაზე უარი, მიხეილ სარჯველაძემ აღნიშნა, რომ ეს მისი პრეროგატივა არ არის.
მიხეილ სარჯველაძის თქმით, სამძებრო სამუშაოების ჩასატარებლად ყველა რესურსი არსებობს.
„აქ არ არის ის მდგომარეობა, რომ მაგალითად, რაღაც ტიპის აპარატურა აკლდეს ამ სამუშაოებს, რომელიმე ტიპის ტექნიკა ან ფიზიკური ძალა. არაფერი იკვეთება ისეთი, რაზეც შეგვიძლია ვთქვათ, რომ შეიძლება უფრო ადრე გაკეთებულიყო, ვიდრე რეალურად კეთდება“, – განაცხადა სარჯველაძემ.
ცნობისთვის, რაჭაში სტიქიის შედეგად, 18 ადამიანის ცხედარია ნაპოვნი და 18 ადამიანს ამ დრომდე ეძებენ.