წალენჯიხაში გზის და წყლის მოთხოვნით აქცია მერთან შეხვედრის შემდეგ დასრულდა
მუნიციპალიტეტის მერთან შეხვედრის შემდეგ დასრულდა აქცია, რომელიც წალენჯიხის სოფელ ჭალეს მცხოვრებლებმა საავტომობილო გზის და წყალმომარაგების სისტემის მშენებლობის მოთხოვნით ჯვარი-მესტიის ცენტრალურ გზაზე გამართეს.
წალენჯიხის მერის, გია ხარჩილავას განცხადებით, ჭალეში გზის მშენებლობა 2024 წელს დაიწყება. რაც შეეხება წყლის მომარაგების სისტემას, მერმა ამ მოთხოვნის შესრულების თარიღი ვერ დაასახელა.
„წყალმომარაგების საკითხი წალენჯიხაში კატასტროფულ მდგომარეობაშია. მიმდინარე წელს 4 უბანს, დაახლოებით 600 ოჯახს, მოვუხერხეთ ჭაბურღილებით საკითხის გადაჭრა. წალენჯიხის ბიუჯეტი არ არის ისეთი, რომ ამდენი წლის განმავლობაში მიგდებული, მიუხედავი საქმე მე ერთ წელიწადში გადავწყვიტო“, - განაცხადა გია ხარჩილავამ.
წალენჯიხის მერიამ ეწერფერდში გზის მშენებლობის პროექტი დასამტკიცებლად საკრებულოს 2023 წლის მაისში წარუდგინა. დეპუტატებმა ხარვეზების გამო დოკუმენტი მერიას უკან დაუბრუნეს. როგორც საკრებულოს თავმჯდომარემ, პარტია „საქართველოსთვის“ წევრმა კორნელი სალიამ უთხრა ჟურნალისტებს, პროექტი დაახარვეზეს, რადგან მასში ხარჯები არ იყო გაწერილი.
გია ხარჩილავა აცხადებს, რომ საკრებულოს ეს პასუხი იყო არაკვალიფიციური:
„პრიორიტეტის დოკუმენტი იმას ნიშნავს, რომ ყველაფრის ფული გვაქვს?! პრიორიტეტის დოკუმენტი ნიშნავს, პირველ რიგში, გასაკეთებელს და თანხების მოძიებას. ანუ ჯერ პრიორიტეტი დგება და თანხების მოძიების პროცესში ვართ. თანხის ღირებულება ხომ უნდა ვიცოდე, რომ პროექტში თანხაზე ვიმუშაო...მათი არგუმენტი არის არაკვალიფიციური. ეს არის იმისთვის, რომ სირცხვილის ოფლი მოიწმინდონ, რომ ამ პროექტს არ მისცენ ხმა...განმეორებით მივმართავთ საკრებულოს. დიდი იმედი მაქვს, რომ საკრებულო დაამტკიცებს. ამის შემდეგ დავიწყებთ მუშაობას მუნიციპალური განვითარების ფონდთან და 2024 წელს ეს პროექტი დაიწყება. ჩემი ძალიან დიდი მონდომებით, გაზაფხულზე დაიწყება. მაგრამ საბოლოო, ყველა ვარიანტში აგვისტოში დაიწყება“, - განაცხადა გია ხარჩილავამ.
წალენჯიხის მუნიციპალიტეტის სოფელ ჭალეს მცხოვრებლებმა საავტომობილო გზის და წყალმომარაგების სისტემის მშენებლობის მოთხოვნით საპროტესტო აქცია დღეს, 29 სექტემბერს, დილით გამართეს. მათ ჯვარი-მესტიის ცენტრალური გზის ჩაკეტვა სცადეს, რისი უფლებაც პოლიციამ არ მისცა. გზის ჩაკეტვის მცდელობისას სამართალდამცველებმა ტერიტორიიდან გაიყვანეს აქციის ორი მონაწილე - პოლიციელებმა ადგილზე განმარტეს, რომ ისინი ტერიტორიას განარიდეს და დაკავებული არ არიან.
ეწერფერდის თემის მცხოვრებლების თქმით, წლებია, ადგილობრივი მერიისგან ითხოვენ სოფლის საუბნო გზის შეკეთებას და წყალმომარაგების სისტემის მშენებლობას, თუმცა ეს მოთხოვნა უყურადღებოდ დარჩა მაშინაც, როცა მუნიციპალიტეტის მერი „ქართული ოცნების“ წარმომადგენელი იყო და ახლაც, როცა ადგილობრივ ხელისუფლებაში უმრავლესობით ოპოზიციაა.
წალენჯიხის მუნიციპალიტეტის სოფელი ჭალე ოკუპირებული აფხაზეთის სოფლებს, მუჟავას და ფახულანს, ესაზღვრება. აქციის მონაწილეების თქმით, ხელისუფლება მათ, როგორც საოკუპაციო ხაზთან მცხოვრებლებს, განსაკუთრებულ ყურადღებას უნდა აქცევდეს და ამისთვის რადიკალური ზომების მიღება არ უნდა უწევდეთ.
როგორც ეწერფერდის მცხოვრებლები ამბობენ, თუ დაპირებების შესასრულებლად ხელისუფლება არ ამოქმედდება, გაცილებით ფართომასშტაბიან საპროტესტო გამოსვლებს დაიწყებენ.