Алматы метросы блэкауттан кейін жұмысын қайта бастады
Алматы метрополитені электр энергиясының өшуіне байланысты уақытша тоқтағаннан кейін жұмысын қайта бастады, деп хабарлайды Tengrinews.kz қала әкімдігіне сілтеме жасап.
"Жолаушылардан кешірім сұраймыз": не болды?
Метроны электр қуатымен жабдықтау жүйесі қалпына келтірілді. Қазір пойыздар жолаушыларды қайта тасымалдап жатыр.
"Қазіргі уақытта электрмен жабдықтау қалпына келтіріліп, метрополитен жұмысы қайта жанданды. Электр пойыздары қалыпты режимде жүріп жатыр. Уақытша қолайсыздық үшін жолаушылардан кешірім сұраймыз және түсіністік танытқандарыңыз үшін алғыс білдіреміз", – деп хабарлады әкімдік.
Метро неге тоқтап қалды?
Бұған дейін 14 тамызда Алматыда электр қуатының жаппай сөнуіне байланысты метрополитен пойыздар қозғалысын уақытша тоқтатқан болатын.
Бекеттердегі жарық пен желдету жүйесі резервтік аккумуляторлар есебінен жұмыс істеп тұрды. Жолаушылар бекеттер мен пойыздардан эвакуацияланды. Tengrinews.kz оқырмандары редакцияға эвакуация кезіндегі видеоларды жолдады.
Tengrinews оқырманы жолдаған фото
Tengrinews оқырманы жолдаған фото
Алматы мен облыстағы жарық мәселесі
Еске сала кетейік, 14 тамызда сағат 15:00 шамасында Алматы мен облыс тұрғындары жарық өшкені туралы хабарлай бастады. Бұған KEGOC компаниясына тиесілі кернеуі 500 кВ әуе электр желілерінің апатты түрде ажырауы себеп болды.
Алдын ала мәлімет бойынша, апат салдарынан жалпы қуаттылығы 300 мегаватт болатын жүктеме ажыратылған.
Алматыда Бостандық, Наурызбай, Әуезов және Алатау аудандарындағы тұтынушылардың бір бөлігі жарықсыз қалды. Блэкаут салдарынан кейбір бағдаршамдар мен метро жұмысы тоқтап, байланыс үзілді және кептеліс пайда болды. Қиылыстарда реттеушілер жұмыс істеді.
Электр энергиясымен байланысты мәселелер Алматы, Түркістан және Жетісу облыстарына да әсер етті. Сондай-ақ іркілістер туралы Орталық Азияның басқа елдерінде – Қырғызстан, Өзбекстан және Тәжікстанда хабарланды.
Алматының кейбір аудандарында жарық беріле бастады. Бұл туралы тұрғындардың өздері хабарлады. Энергетика министрлігі бұған дейін жақын уақытта Алматыда және Қазақстанның басқа өңірлерінде электрмен жабдықтау толық қалпына келтірілетінін хабарлаған болатын.
Тағы оқыңыз: Алматы блэкауттан кейін қалпына келіп жатыр: қалада жарық беріле бастады
Алматыда метро тоқтап қалды: эвакуацияланған жолаушылардың видеосы жарияланды