Жазушы Валерий Михайлов орденмен марапатталды
Президент жазушы Валерий Михайловты І дәрежелі "Барыс" орденімен марапаттады, - деп хабарлайды Tengrinews.kz тілшісі Ақордаға сілтеме жасап.
"Президент Қасым-Жомарт Тоқаев отандық әдебиеттің дамуына қосқан айрықша үлесі үшін жазушы Валерий Михайловты І дәрежелі "Барыс" орденімен марапаттау туралы Жарлыққа қол қойды", - делінген Ақорда ақпаратында.
Валерий Михайловтың өмірбаяны
Кеңестік және қазақстандық журналист, жазушы, Қазақстанның еңбек сіңірген қайраткері және Қазақстанның халық жазушысы Валерий Федорович Михайлов 1946 жылы 7 қыркүйекте Қарағандыда дүниеге келген.
1969 жылы В. И. Ленин атындағы Қазақ политехникалық институтын тау-кен инженері және геофизика мамандығы бойынша бітірді. Сол жылы журналистика саласында жұмыс істей бастады.
1969 жылдан 1979 жылға дейін Михайлов "Вечерняя Алма-Ата", "Ленинская смена" және "Казахстанская правда" газеттерінде әдеби қызметкер, тілші және бөлім меңгерушісі болып жұмыс істеді.
1979 жылы ол "Простор" журналына жұмысқа орналасып, 1987 жылға дейін деректі проза бөлімін басқарды. 1987 жылдан 1993 жылға дейін әдеби және шығармашылық жұмыспен айналысты.
1993 жылдан 1997 жылға дейін Михайлов "Казахстанская правда" газетінің Қарағанды облысындағы тілшісі болып жұмыс істеді, кейінірек басылымның бас редакторының бірінші орынбасары болды.
1997 жылдан 2003 жылға дейін "Казахстанская правда" газетін бас редактор қызметін атқарды.
2003 жылы Михайлов "Просторға" оралып, 2016 жылға дейін бас редактор қызметін атқарды.
Валерий Михайлов көптеген кітаптың авторы. Оның шығармаларының қатарында "Прямая речь", "Хроника великого джута", "Весть", "Немерцающий свет", "Ограда", "Молитвенный дым", "Русский хаос", "Тысячелетие другое", "Угол сердца", "Звон", "Сердце нараспев", "Год козла", "Дымящийся свиток", "Тополиная ветка, или Восвояси", "У чёрной розы белые шипы", "Пустынный берег" және басқалары бар.
Валерий Михайлов 1996 жылы "Парасат" орденімен, ал 2021 жылы 2-ші дәрежелі "Барыс" орденімен марапатталды. 2014 жылы оған Қазақстанның еңбек сіңірген қайраткері атағы берілді.
2024 жылы Михайловқа Қазақстанның халық жазушысы құрметті атағы берілді.
Сілтемесіз жаңалық оқисыз ба? Онда Telegram желісінде парақшамызға тіркеліңіз!