Иранның одақтасы Сауд Арабиясының астанасына соққы жасады
Иранды қолдайтын йемендік "Ансар Аллах" (хуситтер) қозғалысы Сауд Арабиясының астанасы Эр-Риядқа зымыранмен және дронмен соққы жасағанын, сондай-ақ, Saudi Aramco мұнай компаниясының нысандарына бөлек шабуыл жасағанын мәлімдеді, - деп хабарлайды Tengrinews.kz тілшісі "Анадолу" және DW басылымдаына сілтеме жасап.
Хуситтердің әскери өкілі Яхья Сари X әлеуметтік желісінде қозғалыстың жұмаға қараған түні "баллистикалық және қанатты зымырандарды, сондай-ақ, ұшқышсыз ұшу аппараттарын" пайдалана отырып, екі операция жүргізгенін жазды.
Оның айтуынша, алғашқы операция Эр-Риядтағы "маңызды нысандарға", ал екіншісі батыс жағалаудағы Янбу қаласында орналасқан Saudi Aramco нысандарына бағытталған.
Сауд Арабиясы корольдік әуе күштерінің офицері, бригадалық генерал Турки аль-Малики хуситтердің Эр-Риядқа алғаш рет баллистикалық зымыранмен соққы жасауға тырысқанын айтады. Оның сөзінше, зымыран "қолға түсіріліп, жойылған".
Түнде Эр-Риядта әуе дабылы жарияланып, кейбір тұрғындар жарылыс дыбысын естіген. Зардап шеккендер немесе қирандылар туралы ақпарат түскен жоқ. Кейінірек әуежай маңында түтін бағаны көрінген. AFP агенттігінің мәліметінше, Сауд Арабиясының ең ірі Aramco мұнай компаниясының отын резервуары өртеніп, кейін сөндірілген.
11 қыркүйекте БАҚ хуситтердің Қызыл теңіз бен Араб теңізін жалғайтын Баб-эль-Мандеб бұғазындағы стратегиялық маңызды аралдарды басып алғанын хабарлады. Бұл бұғаз арқылы әлемдік жүк тасымалының, соның ішінде мұнай саудасының шамамен 12 пайызы өтеді; Ормуз бұғазы жабылғаннан кейін ол әсіресе Сауд Арабиясы үшін аса маңызды болды. Хуситтер Баб-эль-Мандеб арқылы кеме қатынасы "саудтықтардан басқа барлық коммерциялық кемелер үшін қауіпсіз" деп мәлімдеді.
Күні кеше хуситтердің Баб-эль-Мандеб бұғазының йемендік жағалауындағы Моха портын өз бақылауына алғаны белгілі болды. Reuters агенттігінің хабарлауынша, хуситтердің ілгерілеуін Иранның Ислам революциясы сақшылар корпусы (ИРСК) басқарып отыр. Тегерандағы дереккөздер осылайша Иран АҚШ-пен текетіресте жаңа майдан ашуды көздеп отырғанын алға тартады.