Кара-Балта, Таш-Көмүр шаардык кеңешине үгүт өнөктүгү башталды
Кара-Балта жана Таш-Көмүр шаардык кеңештеринин депутаттыгына талапкерлерди каттоо мөөнөтү аяктап, 5-январдан тартып үгүт өнөктүгү башталды. Бул тууралуу Борбордук шайлоо комиссиясынан маалымдады. Азыркы учурга карата Жайыл аймактык шайлоо комиссиясы тарабынан сегиз саясий партиянын талапкерлеринин тизмелери катталды. Алар: “Элдик-Народная”, “Эламан”, “КСДП”, “Жакшылык-Добро”, «Мекеним Кыргызстан», «Өнүгүү-Прогресс», «Республика», «Кыргызстан элдеринин тилектештиги» саясий партиялары. Чүй облусунун Кара-Балта шаардык кеңешине аталган партиялардан 424 талапкер көрсөтүлгөн.
Таш-Көмүр шайлоо комиссиясы жети саясий партиянын талапкерлеринин тизмесин каттады. Алар:«Мекеним Кыргызстан», «КСДП», «Ата-Журт», «Өнүгүү-Прогресс», «Улуу-Көч», «Бүтүн-Кыргызстан», «Таш-Көмүр жаштары» саясий партиялары. Жалал-Абад облусунун Таш-Көмүр шаардык кеңешине аталган партиялардан 373 талапкер көрсөтүлгөн.
Мындан сырткары кезектеги жана мөөнөтүнөн мурда шайлоо өтө турган айылдык кеңештердин депутаттыгына талапкерлерди көрсөтүү аяктады.
БШКнын буга чейинки маалыматына караганда, Чүй, Жалал-Абад, Нарын жана Ош облустарынын айрым жергиликтүү кеңештерине 28-январда өтө турган шайлоого 8 292 300 сом жумшалат. Бул акча шайлоого даярдык көрүүгө жана өткөрүүгө сарпталат. (КЕ)