Сузакта үй-бүлө ур-токмокко кабылып, үй ээси каза болду
30-декабрь түнү Сузак районунун Күмүш-Азиз айылындагы үйлөрдүн бирине белгисиз адамдар кирип, анда жашагандарды ур-токмокко алышкан. Экспертиза алардын колунда темир мык сууругуч жана күрөк болгонун аныктады. Алар үйдүн ичинен баалуу буюмдарды издеп, таба албагандан кийин качып кетишкен.
Натыйжада үй ээси, 1956-жылы туулган жаран, анын 1964-жылкы аялы жана 2002-жылы туулган кызы оор абалда ооруканага түшкөн. 3-январда карактоого кабылган үйдүн кожоюну алган жараатынан өзүнө келбестен ооруканада каза болду. Бул тууралуу Жалал-Абад облустук милициясы кабарлады.
Милиция “каракчылык” беренеси менен кылмыш ишин козгоп, 4-январь күнү окуяга шектүү катары Сузак районунун Кайрагач айылынын 1995-жылкы тургунун кармады. Ал кылмышка катышканын мойнуна алып, учурда убактылуу кармоочу жайга киргизилген.
Жалал-Абад ОИИБнын басма сөз кызматы маалымдагандай, алдын ала маалыматтарга ылайык, буга чейин жабырлануучу аял менен кылмышка шектүүнүн ортосунда аласа-бересе болуп, чырга акча себеп болгону айтылууда.
Учурда милиция кармалган адамдын мындан башка кылмыштарга тиешеси бар-жогун аныктоодо жана карактоого катышкан башка мүчөлөрдү издөөнү улантууда. (RsK/SDz)