Орусиянын курал экспортунун жылдык көлөмү 14 млрд доллардан ашты
Бул маалыматты "Интерфакс" агенттиги Орусиянын аскер-техникалык кызматташтык тармагында иштеген булагына таянып таратты.
Өткөн жылы декабрдын аягында Орусия президентинин аскерий-техникалык багыт боюнча жардамчысы Владимир Кожин батыш киргизген санкцияларга карабай, 2017-жылы Орусияда жаңы өнөктөштөр - "буга чейин эч качан курал сурап Орусияга кайрылбаган" мамлекеттер пайда болгонун маалымдаган.
Былтыр августтун аягында аскер-техникалык кызматташтык боюнча федералдык кызматтын башчысы Дмитрий Шугаев орусиялык курал-жарактарга жана аскер техникаларын экспорттоого буйрутмалардын көлөмү 47-50 миллиард долларды түзөрүн кабарлаган.
Ал эми Тынчтыкты изилдөөчү Стокгольм институтунун маалыматы боюнча, Орусия, АКШ жана Кытай дүйнөдө курал-жарак экспорттоочу ири өлкөлөрдөн болуп кала берүүдө. Курал-жарак экспортунун жалпы көлөмүнүн 23% Орусиянын үлүшүнө туура келет.