Кыргызстандык дуэт Казакстандагы сынакта 1-орунду алды
Казакстандын Астана шаарында өткөн Art premium аталышындагы I эл аралык музыкалык сынакта кыргызстандык Шахжохан Маманазаров менен Шайырбек Абдурашит уулу 1-орунду ээледи. Бул тууралуу "Азаттыкка" Шахжохан Маманазаров билдирди. Анын айтуусунда, сынак 4-7-январ күндөрү өтүп, ага Казакстан, Орусия, Кыргызстан, Өзбекстан жана Өзбекстандын курамындагы Каракалпакстан Республикасынан 84 өкүл катышты. Жеңүүчүлөр 10 жанрда ар кайсы жаш куракта өз-өзүнчө аныкталган.
Шахжохан Маманазаров домра-прима аспабында, Шайырбек Абдурашит уулу аккордеондо ойноп, 16 жаштан 18 жашка чейинкилер арасында өнөрлөрүн тартуулашты. Алар италиялык композитор Витторио Монтинин "Чардаш" аттуу чыгармасын ойноп, калыстардын жогорку баасына татыган жана 1-орунду ээлегендиги тууралуу дипломго, ошондой эле кубокко ээ болушкан.
Жаш таланттар Ош шаарындагы Ниязалы Борошев атындагы музыкалык окуу жайда билим алышат. (ECh).