Коопсуздук кеңешинин катчысынын орун басары кызматтан кетти
Президентинин аппаратынын маалыматтык саясат бөлүмүнүн билдиргени боюнча, Марат Төрөбеков өз арызы менен кызматынан кеткен.
2017- жылдын 18-декабрында президент Сооронбай Жээнбековдун жарлыгы менен Коопсуздук кеңешинин катчысы Алмазбек Курманалиев кызматтан алынган. Андан бери бул кызматка эч ким дайындала элек.
Коопсуздук кеңеши 2010-жылы апрель ыңкылабынан кийин Коргоо кеңеши болуп өзгөргөн. Былтыр жаңы Конституция кабыл алынганда кайра Коопсуздук кеңеши болуп аты алмашкан.
"Коопсуздук кеңеши тууралуу" жаңы мыйзам 2017-жылдын май айында кабыл алынган. Документке ылайык, президент кеңештин төрагасы болуп эсептелет жана ал катчыны дайындап, иштен алат.
Улуттук коопсуздукка байланыштуу маселелер боюнча кеңеш жылына кеминде эки жолу чогулуп турат жана керек учурда кезексиз жыйындар да өтүшү мүмкүн. (TSh)