Алты жаштагы баланы зордуктагандар боюнча сот өкүмү чыкты
Алты жаштагы баланы зордуктаган деп айыпталган үч адамдын иши боюнча сот өкүмү чыкты. Жети-Өгүз райондук соту аларды эркинен ажыратканын Ысык-Көл облустук сотунун басма сөз катчысы Гүлзада Аширбаева билдирди.
Кылмыш жасаган адамдын бири 9 жылга эркинен ажыратылып, жазасын күчөтүлгөн тартиптеги түзөтүү абагында өтөй турган болду. Экөө болсо сегиз жылга абакка кесилди. Алар жазасын өспүрүмдөрдүн колониясында өтөйт.
Моралдык зыян катары жабырлануучунун мыйзамдуу өкүлүнүн пайдасына соттолуучулардын бирөөнөн 100 миң сом, экөөнөн 50 миң сомдон өндүрүү милдеттендирилди.
Жети-Өгүз районунда алты жаштагы баланы зордуктоого шектүү делип үч адам кармалган. Тергөөнүн маалыматына ылайык, өткөн жылдын апрель айында алардын бири кошунасынын алты жаштагы баласын алдап, чоң энеси менен жашаган үйгө алып барып зордуктаган. Ошондон кийин кылмышка дагы экөө аралашып, баланы бир нече жолу зордуктап келишкен. Зордук көргөн бала ата-энесине айткандан кийин гана кылмыш ачыкка чыккан.
Милиция көп өтпөй кылмышка шектүү деп 16-17 жаштагы жергиликтүү үч тургунду кармаган. Үчөө тең кылмышты мойнуна алган. (AsM\ErN)