ЕБ депутаттары казак бийлиги менен "саясий туткундар" тууралуу сүйлөштү
Жолугушуудан кийинки маалымат жыйынында Европарламенттин делегациясынын башчысы Ивета Григуле Петерс Казакстандагы нааразылык акциялары, анда коюлган талаптар тууралуу укканын билдирди. Ал бул маселени казак бийлиги менен сүйлөшкөнүн да айтты:
- Бул маселе биздин күн тартибибизде болду. Бул жакка келердин алдында электрондук почтабызга туткундарга байланышуу каттар келди. Казакстандын Башкы прокуратурасынан Макс Бокаев, Талгат Аян тууралуу жооп алып, 11-майда прокуратура өкүлдөрү менен да жолугушабыз.
10-майда Казакстандын Астана, Алматы, Орол, Актөбө, Атырау, Семей жана Чымкент шаарларында “саясий туткундарды камактан чыгарууну талап кылган” нааразылык акциялары өттү. Астанадагы митингге чыккандар Еврошаркеттин өкүлдөрүнө казак бийлигине коюп жаткан талаптарын жеткирүүнү сурануу үчүн келгенин билдиришкен.
Кийин Астана менен Алматыдагы митингге катышкан ондогон адамды полиция "урусат берилбеген көчө жыйынын өткөрүп жатышат" деген негизде күч менен кармап кетти. Кармалгандардын бир тобу административдик жазага тартылды.
"Саясий туткундарды камактан бошотуу" урааны менен ондогон адам катышкан митингдерде социалдык, экономикалык жана саясий талаптар да жаңырды.
Казакстандык ири ишкер жана банкир, 2009-жылдан бери Европада бозгунда жашап жүргөн Мухтар Аблязов бүгүн Казакстандын бир канча шаарында өткөн митингдерди ал уюштурганын "Азаттыктын" казак кызматынын суроосуна жооп берип жатып айтты.
Өлкөнүн Ички иштер минристрлиги, Башкы прокуратура бүгүнкү митингдерге байланыштуу эч кандай пикир билдире элек.