Мэй: Трамп Евробиримдикти сотко берүүнү сунуштады
Британиянын премьер-министри Тереза Мэйдин айтымында, АКШ президенти Дональд Трамп ага Евробиримдикти сотко берүүнү сунуш кылган.
Трамп өзү 13-июлда Мэй менен биргелешип журналисттерге курган маалымат жыйынында британ өкмөт башчысына сунуш киргизгенин, бирок Мэй ал сунушту "абдан катаал" деп эсептегенин айткан.
15-июлда Би-би-синин кабарчысынын "ал эмне деген сунуш эле?" деген суроосуна жооп берип жатып Мэй "Ал мага Евробиримдикти сотко беришим керектигин айтты. Ал сүйлөшүүлөргө барба, сотко бер деди"-деп айтты.
Британия Евробиримдиктен 2019-жылдын март айында чыгышы керек. Мындай чечим 2016-жылдын жайында өткөрүлгөн референдумдан кийин кабыл алынган. Анда Британия калкынын жарымынан бир аз көбү Евробиримдиктен чыгууну жактырган.