ММК: Скрипалдарды ууландырууга шектелген үчүнчү киши кармалды
Британ полициясы мурдагы орусиялык чалгынчы Сергей Скрипалды жана анын кызы Юлияны ууландырууну уюштурууга шектелген үчүнчү кишини тапканын “Телеграф” басылмасы 27-сентябрда кабарлады.
Маалыматка караганда, үчүнчү шектүү да орусиялык чалгын офицер, алдын ала барып Солсберини иликтеп, ууландырууну уюштурууга жардам берген. Азырынча аты-жөнү айтыла элек. Ал тапта негизги шектүүлөрдүн биринин чыныгы аты-жөнүн "Беллингкат" иликтөө агенттиги таап, ал Руслан Боширов эмес, Анатолий Чепига аттуу чалгын башкармалыгынын полковниги экенин, 2014-жылы Орусиянын баатыры наамын да алган деп жарыялаган.
5-сентябрда британ полициясы Сергей Скрипалды жана анын кызы Юлияны ууландырууга тиешеси бар деп, орусиялык эки жарандын - Руслан Боширов менен Александр Петровдун атын атаган. Бирок ошол эле кезде алардын чыныгы аты-жөнү башка болушу мүмкүн экенин да маалымдаган. Иликтөөчүлөр Александр Петровмун деген шектүүнүн да анык тек жайын жакын арада ашкерелейбиз деп убада берип жатышат.