Коопсуздук кеңешинин катчылыгы мыйзамсыздык үчүн элчи Султанды айыптады
Корутунду президенттин кароосуна киргизилди. Анда айтылгандай, текшерүү учурунда элчинин билдирүүсүндө жана Тышкы иштер министрлигинин (ТИМ) жүйөлөрүндө жана маалымат каражаттарында чагылдырылган ТИМдин системасындагы мыйзам бузуу орун алганы аныкталды.
Ошол эле учурда изилдөөдө Кылычбек Султан мурда Малайзияда элчи болуп иштеп жүргөндө мыйзамга туура келбеген аракеттерге барганы аныкталган. Аталган кызматтан бошотулгандан кийин да Кылычбек Султан өзүнүн жана үй-бүлө мүчөлөрүнүн “аккредитациялык карточкасын” өткөрүп бербегени да белгиленген тартипти бузуу болуп эсептелери айтылган.
Коопсуздук кеңешинин катчылыгы ошондой эле Кылычбек Султанды мамлекеттик кызматта иштеп туруп, бир эле учурда “Супер”, “Супер кроссворддор”, “Супер сканворддор” гезиттери чарбалык субъектилеринин жетекчиси болгонун да сынга алган. Катчылык бул фактыларга укуктук баа бериш үчүн материалдарды Башкы прокуратурага жөнөттү.
Буга чейин Түштүк Кореядагы элчи Кылычбек Султан Тышкы иштер министрлигиндеги жана дипломатиялык паспортторду колдонуудагы мыйзам бузулган учурлар тууралуу билдирүү менен чыккан. Анын билдирүүлөрүн текшерүүнү президент Сооронбай Жээнбеков Коопсуздук кеңешинин катчылыгына тапшырган. (ErN)