Пакистандын премьери митингчилерди "эл душманы" деп атады
- Бүгүн мен өз элиме айткым келет: силерди козуткусу келген ал кишилерди укпагыла. Бул исламга кызмат кылуу эмес. Бул өлкөнү кыйратуу жана эл душмандарынын аракети. Алар адамдарды сотторду өлтүрүүгө, армияны өз жетекчисине каршы көтөрүлүүгө көкүтүп жатышат, – деди Хан шаршембинин кечинде.
Премьер митингчилерге “мамлекет менен тирешпегиле” деп эскертти.
Асия Биби аттуу аял "Мухаммед пайгамбарга акарат келтирген” деген негизде тогуз жыл мурда өлүм жазасына кесилген. 31-октябрда Пакистандын Жогорку соту христиан дининдеги ал аялды актаган. Буга ашынган динчилдердин “Техрик-е Лабаик” партиясынын тарапкерлери нааразылык билдирип, Карачи жана Лахор шаарларында көчөгө чыгышкан.