Нойерт АКШнын БУУдагы элчисинин кызматына көрсөтүлдү
6-декабрда маалым болгондой, ABC жана “Fox News” телеканалдарынын мурдагы алып баруучусу жана кабарчысы Нойерт Никки Хейлинин ордуна барат. Хейли быйыл октябрда БУУдагы кызматынан жыл соңунда кетерин жарыялаган.
Трамп буга чейин Нойерттин дарегине мактоо сөздөрүн айтып келген.
- Ал мыкты адам. Ал биз менен көп жылдан бери чогуу келатат. Көптөн бери бизди колдоп келет, - деген президент.
48 жаштагы Нойерт Мамлекеттик департаменттин басма сөз катчысы болуп 2017-жылдын апрелинде дайындалган.
Байкоочулар Нойерттин саясатта тажрыйбасы жок болгонун эске алуу менен анын талапкерлиги БУУдагы дипломатиялык пост үчүн адаттан тыш тандоо экенин белгилеп жатышат.