Экзит-полл: президенттик шайлоодо Зеленский 73,2 пайыз добуш алды
Экзит-полл - коомдук уюмдардын шайлоодо элдин кимге добуш бергенин сурамжылоо аркылуу жүргүзгөн алдын ала жыйынтыгы.
Аны Украинадагы Деморатиялык демилге фонду, Киев эл аралык социологиялык институту жана Разумков борбору биргелешип жасады.
Ал эми шайлоонун алдын ала расмий жыйынтыктары бүгүн кечке маалым боло баштайт.
Бүгүн, 21-апрелде Укринада президенттик шайлоонун экинчи айлампасы өттү. Ага талапкерлер Петро Порошенко менен Владимир Зеленский катышты.
Шайлоого 82 миң жергиликтүү жана 2,5 миң эл аралык байкоочу көз салууда.
Бул - 2014-жылдагы Майдан окуялары деген ат менен белгилүү элдик толкундоолордун натыйжасында ошол кездеги президент Виктор Януковичтин бийлиги кулап, андан көп өтпөй Орусия Крымды аннекциялап алган окуялардан кийинки экинчи президенттик шайлоо.
Президенттик шайлоонун биринчи айлампасы 31-мартта өтүп, азыркы президент Петро Порошенко менен актёр Владимир Зеленский 39 талапкердин ичинен суурулуп чыгышкан.
Анда Порошенко 16, Зеленский 30 пайыздай добуш алган.
41 жаштагы актер жана куудул Владимир Зеленский мамлекеттик кызматта иштеген эмес. Ал өзү негиздеген «Квартал-95» студиясы менен концерттерди коюп, элге куудулдук өнөрүн, телесериалдарын тартуулап келди. 2014-жылы Европага ык алган тарапты колдоп, жарандык позициясын да билдирген. Шайлоо өнөктүгү учурунда өзүн жаңы муундун өкүлү, келечектеги карапайым президент катары көрсөтүүгө аракеттенди.
53 жаштагы Петр Порошенко экинчи президенттик мөөнөткө ат салышты. Ал шайлоо кампаниясында өзүн күчтүү кол башчы, Орусияга татыктуу каршылык көрсөтө алган лидер катары сыпаттап келди.