Швецияда Ассанжга каршы иликтөө кайра жанданды

Швеция "Викиликстин" негиздөөчүсү Жулиан Ассанжга тагылган зордуктоо айыптары боюнча баштапкы иликтөөнү кайра жандандырды. Бул тууралуу Швеция прокуратурасынын расмий өкүлү Ева-Мария Перссон 13-майда Стокгольмдо билдирди. Анын айтымында, Ассанждын өткөн айда Эквадордун элчилигинен чыгып, британ тартип коргоо органдарынын колуна түшкөнү аны суракка алууга мүмкүнчүлүк түздү. 


Швецияда Ассанжга карата иликтөөнү кайра жандандыруу чечимине 2010-жылы анын зомбулугуна кабылганын айткан аялдын кайрылуусу себеп болгон. Мындан улам швед тарап Ассанж Британиядагы абак жазасын 2020-жылы өтөп бүткөндөн кийин аны Швецияга экстрадициялоону өтүнмөкчү. 


Кошмо Штаттар да австралиялык Жулиан Ассанжды "Викиликс" сайтына маалымат берген америкалык жоокер Челси Мэннинг менен алдын ала сүйлөшүп алып, Ооганстан жана Ирактагы согуштар тууралуу Американын "миңдеген жашыруун мамлекеттик документтерин уурдаган жана жарыялап жиберген" деп күнөөлөп жатат. 


"Викиликстин" 47 жаштагы негиздөөчүсү 2012-жылы Эквадордун Лондондогу элчилигинде убактылуу башпаанек таап, ал жерде жети жыл жашады. Быйыл 11-апрелде Эквадор ага баш калка берүүдөн баш тарткан соң британ полициясы аны камакка алган. 


1-майда Лондондун райондук соту Ассанжды жети жыл мурда аны күрөөгө бошоткон британ сотунун чечимин бузган деп таап, бир жылга абакка кескен.