Сот Жанар Акаевдин пайдасына чечим чыгарды
Жогорку соттун басма сөз кызматы "Альянстын" доо арызы канааттандырылып, БШКнын тиешелүү токтому мыйзамсыз деген негизде жокко чыгарылганын ырастады. БШК чечим тууралуу комментарий бере элек.
Боршайком 15-декабрда партиялык тизме менен шайланып келген талапкерлер арасында 30% гендердик квота кандай сакталары тууралуу жобосун өзгөрткөн. Ага чейин маселе эки жолу талкууланып, колдоо тапкан эмес.
БШК кабыл алган жобого ылайык "Альянс" партиясынан талапкер Жанар Акаевдин ордуна Токтобүбү Оргалча депутат болмок.
Депутат Жанар Акаев Боршайкомдун чечимин "акылга сыйгыс" көрүнүш катары баалаган. "Альянс" партиясы 17-декабрда БШКнын чечимине каршы Бишкек шаарынын административдик сотуна арыз жазган. 20-декабрда сот партиянын арызын карап, эки жолу кийинкиге жылдырган.
28-ноябрдагы парламенттик шайлоодо алты партия 5% босого чектен өткөн. "Альянс" партиясы жети мандат алган. (МТа)