Оштогу Бабур театрын толук жаңылоо иши сентябрда аяктайт
Ош шаарындагы Бабур атындагы мамлекеттик академиялык өзбек музыкалык драма театрынын имаратын жаңылоо иштери быйыл сентябрь айында жыйынтыкталат. Бул тууралуу 1-апрелде Ошко иш сапары менен келген Өзбекстандын премьер-министри Абдулла Арипов имаратты оңдоп-түзөө иштеринин жүрүшү менен таанышканы барганда айтылды.
500 көрүүчүгө эсептелген театрдын имаратын жаңылоо иштери 2021-жылдын сентябрында башталган, ага өзбек өкмөтү 5 миллион доллар бөлгөн.
Театрды толук жаңылоо тууралуу макулдашуу президент Садыр Жапаровдун 2021-жылы жазында Ташкентке сапары учурунда кабыл алынган.
Бабур атындагы театр – Борбор Азиядагы алгачкы маданий жайлардын бири. Ал 1918-жылы ачылган, 2004-жылы президенттин жарлыгы менен театрга академиялык деген макам ыйгарылган. Театрдын чыгармачыл жамааты 60тай адамдан турат. (RK)