Кара-Кече кенинде топурак көчтү
Жумгал районундагы Кара-Кече кенинде 2-июлда топурак көчкөнү белгилүү болду. Бул тууралуу маалыматты "Кыргыз көмүр" мамлекеттик ишканасы ырастады.
"Кара-Кечеде көчкү жүрдү, адам кырсыгы болгон жок, болжолдуу маалыматтар боюнча 30-40 мин куб топурак көчтү. Техниканы топурак басып калды деген маалымат чындыкка дал келбейт".
Ишкананын билдирүүсүндө, учурда иш штаттык режимде уланып, көмүр казуу жүрүп жатат. Окуя болгон аймакта жумуш жүргөн эмес.
Акыркы жылдары Кара-Кече кенинде эки жолу жер көчкөн. 2020-жылы тоо көчүп, жолду бөгөп калган. Ал эми былтыр жеке ишканалардин бири көмүр казган жайда жер көчүп, бир экскаваторду басып калган.
Деңиз деңгээлинен 2800 метр бийиктикте жайгашкан Кара-Кече көмүр кени 1913-жылы ачылган.
Республика боюнча көмүр казган 70тен ашуун компания бар. Туруктуу иш алып барган компаниялардын саны 40ка чукул.