Карловы Вары кинофестивалынын баш байгесин ирандык режиссердун фильми жеңди
Чехиянын Карловы Вары шаарында 9-июлда аяктаган кинофестивалдын баш байгесин ирандык режиссер Садаф Форугинин “Үмүт тартуулаган жай” аттуу фильми жеңди.
“Кристал глобусуна” татыган тасма машыктыруучу менен улуттук биринчиликке даярданып жаткан өспүрүмдүн таржымалын баяндайт. Бул - Канадада жашаган 45 жаштагы режиссердун экинчи көркөм фильми. 2017-жылы Форуги “Ава” деген тасмасын тартуулаган.
Эң мыкты актриса наамын грузиялык Таки Мумладзе жана Мариям Хундадзе грузин-немис фильминдеги ролдору үчүн бөлүшүп алды.
56-жолу өткөрүлгөн фестивалда 1-9-июль күндөрү 170 фильм, арасында 130 көркөм тасма көргөзүлдү. Уюштуруучулар 121 миңден ашуун билет сатылганын билдиришти.