Непалда учак кыйрап, 32 киши мерт болду
Покхар курорттук шаарындагы жаңы ачылган аэропортко 72 орундуу учак конуп жатып, капчыгайга кулаган.
Каски районунун башкы административдик кызматкери Тек Бахадурдун билдиришинче, куткаруучулар Покхара эл аралык аэропортунан 1,6 чакырым алыстыкта жайгашкан Сети дарыясынын жанында, кырсык болгон жерде издөө иштерин жүргүзүп жатышат.
Учактын кыйрашынын себептери азырынча белгисиз.
Непалдын жарандык авиация башкармалыгынын маалыматына караганда, Yeti Airlines компаниясына таандык эки моторлуу ATR 72 учагында 68 жүргүнчү, анын ичинде 15 чет элдик жаран жана төрт экипаж мүчөсү болгон. Чет элдиктердин арасында беш индиялык, төрт орусиялык, эки түштүк кореялык жана Ирландиядан, Австралиядан, Аргентинадан жана Франциядан бирден жаран болгон.
Кырсыктан соң аэропортко келген премьер-министр Пушпа Камал Дахал учак борбор шаар Катмандудан Покхарга учуп баратканын билдирди. Ал коопсуздук кызматын жана коомчулукту издөө иштерине жардам берүүгө чакырды.