Бишкек-Баткен-Бишкек авиакаттамы кайра жанданды
Бүгүн, 7-февралдан тартып Бишкек-Баткен-Бишкек авиакаттамы кайра жанданды. Бул тууралуу “Манас” эл аралык аба майданы билдирди. Буга чейин "Тез Жет" авиакомпаниясы Бишкектен Баткенге аптасына бир жолу – ар шейшемби сайын каттап турары маалымдалган.
"Баткен" аэропорту былтыр 1-августта аэродромдогу оңдоп-түзөө иштерине байланыштуу убактылуу жабылган.
Буга чейин президент Садыр Жапаров 2026-жылга чейин өлкө аймагындагы ички жана эл аралык аба майдандар жаңыланып, ички каттамдар жанданарын да айткан.
“Манас” эл аралык аэропорту” ачык акционердик коомуна Кыргызстандын аймагындагы 11 аэропорт карайт. Алардын бешөө – "Манас", "Ош", "Ысык-Көл", "Каракол" жана "Баткен" эл аралык, ал эми алтоо –"Жалал-Абад", "Исфана", "Караван", "Казарман", "Нарын" жана "Талас" аймактык деген макамга ээ.