The Killers рок-тобу Грузиядагы окуя үчүн кечирим сурады
Америкалык The Killers рок-тобу Грузиядагы концертте орусиялык күйөрманын сахнага чакырганы үчүн кечирим сурады.
Курорттук Батуми шаарында 14-августтун кечинде болгон концертте топтун мүчөсү Брэндон Флауэрс салтка айлангандай эле залдагы күйөрмандарынын бирин сахнага чакырган.
Сахнага чыгып, добулбаста ойноону суранып жаткан жигит орусиялык экенин айтканда залдагы күйөрмандар ышкырык, ызы-чуу башташкан.
Чогулгандар орусиялыктын сахнадан кетишин талап кылганына карабай топ концертти уланткан. Ал эми Флауэрс залдагыларды тынчытуу максатында алардын күйөрмандарынын баары «эже-карындаш, ага-ини» экенин айткан.
Мындан кийин көптөр «Орусия баскынчы» деген ураандарды чакырып, залдан чыгып кетишти.
The Killers 15 августа Инстаграмда жарыялаган билдирүүсүндө кечирим сурап, эч кимди капа кылгысы келбегенин жазган.
«Биз The Killers тобунун баардык күйөрмандары эже-карындаш, ага-ини» деп айтканыбыз туура эмес кабыл алынып калганын түшүнүп турабыз», - деп белгиленет анда.
2008-жылы Грузия менен болгон беш күндүк согуштан кийин Орусия өз аскерлерин Абхазия менен Түштүк Осетиянын аймактарына жайгаштырып, аларды көз карандысыз деп тааныган.
Тбилиси бул аймактарды Орусия басып алган деп эсептейт.