Бишкекте Комуз күнү белгиленет
9-сентябрь - Комуз күнүн утурлай Жалал-Абад облусунун Токтогул шаарында залкар комузчу Карамолдо Орозовдун 140 жылдык мааракесине арналган майрамдык иш-чара болуп өттү. Бул тууралуу райондук администрациядан билдиришти. Анда балдар музыкалык мектебинин жана балдар чыгармачылык үйүнүн комузчулары катышып, Т.Сатылганов, К.Досуев, А.Огомбаев, К.Орозов жана башка залкарлардын күүлөрү чертилди.
Комуз күнү 9-сентябрда Бишкектеги Т.Сатылганов атындагы Кыргыз улуттук филармониясында дагы белгиленет. Маданият, маалымат, спорт жана жаштар саясаты министрлигинин маалыматына караганда, бул күнү залкар комузчу Карамолдо Орозовдун 140 жылдыгына арналып, концерт өтөт.
2019-жылы президенттин жарлыгы менен Кыргызстанда 9-сентябрь комуз күнү деп жарыяланган.
Комуз - кыргыз элинин чертме музыкалык аспабы. Ал өрүк, жаңгак, арча жана башка бир катар жыгачтардан чабылат. Кыргыздын салттуу музыкасынын басымдуу бөлүгү комузда чертилет.