Түркияда Стамбул мэрине иш козголуп, оппозиция өкүлдөрү кармалды

Түркияда Стамбулдун мэри Экрем Имамоглуга каршы кылмыш иши козголуп, бир нече оппозициячыл саясатчы камакка алынды. "Настоящее время" телеканалынын маалыматына караганда, камалгандар арасында Түркиянын "Зафер" партиясынын лидери Үмит Оздаг, Түркиянын Республикалык элдик партиясынын лидери Өзгүр Өзел жана Стамбулдун Бешикташ районунун башчысы Рыза Акполат бар.


Түрк басылмалары Экрем Имамоглу Стамбулдун башкы прокурору Акин Гүрлек жана анын үй-бүлөсү тууралуу айткан сөздөрү үчүн "коркутуу" жана "терроризмге каршы күрөшкөн адамдарды куугунтуктоо" беренелери боюнча айыпталып жатканын жазышты. Маалыматка караганда, Имамоглу буга чейин телепрограммалардын биринде башкы прокурорго кайрылып, ал жана анын үй-бүлөсү тууралуу сүйлөгөн.




Мэр X социалдык тармагына эч кимдин балдарын коркутпаганын, "калыс адилеттүүлүккө" гана чакырганын жазып, тергөө жүрүп жатканын билдирди.


Оппозициялык "Зафер" партиясынын лидери Үмит Оздаг Түркиянын президенти Режеп Тайып Эрдоганды "кемсинткен" деген айып менен Анкарада кармалганын Cumhuriyet гезити жазды. Маалыматка караганда, саясатчы Стамбулга жеткирилди. Прокуратура ага карата кылмыш ишин козгоду. Буга ал  Түркиядагы сириялык качкындарды чыгаруу зарылдыгы тууралуу бир нече жолу айтканы, дин боюнча Эрдогандын саясатын сынга алганы себеп болгону кабарланды.


"Мен бул сөздү дагы миң жолу айтууга даярмын. Мени түрмөгө камап же атып салсаңар болот",-деди Оздаг камоо чечимине байланыштуу пикирин билдиргенде.


Саясатчынын камалышын түрк оппозициясынын өкүлдөрү сынга алышты.


Түркияда президентти мазактады деп айыпталгандар бир жылдан төрт жылга чейин эркинен ажыратылат. (AiA)