МИК: Ипотекага алынган үйлөрдү ижарага берүүгө болбойт
Мекеме батирлерди жалаң гана үй-жайы жок жарандарга сунуштай турганын белгилеп, ипотекалык программа аркылуу батирдин наркынын 50% төлөгөн адамдар да үй ала аларын маалымдады.
"Биз батирлерди ижарага берүүгө же сатууга тыюу салган нормаларды киргиздик. Ипотекалык батирдин толук акысын төлөгөндөн кийин сатабы же ижарага береби, үй ээсинин өз эрки болот. Азырынча бизге караштуу мамлекеттик ипотекалык батирлердин ачкычтары гана берилген. Банктын жана биздин компаниянын расмий документтери аркылуу бул үйлөрдү толук колдонуу боюнча дагы бир нече этап бар. Биз тараптан толук расмий макулдашуулар жана банктын бардык зарыл жол-жоболор аяктаганга чейин батирлерди ижарага берүү мыйзамсыз жана бул биздин иш эрежелерибизге карама-каршы келет. Ипотекалык батирлерди эч ким ижарага бере албайт", -деп жазылган маалыматта.
Мамлекеттик ипотекалык компания бул багытта иш жүрүп жатканын жана жакынкы убакытта бардык суроолор боюнча так эрежелер ишке киргизилерин кошумчалады.
Былтыр 16-декабрда Бишкектин Скрябин көчөсүндө Мамлекеттик ипотекалык компания курган 549 батир, 24-декабрда №47 түзөтүү колониясынын ордуна түшкөн “Мурас” турак жай комплексинен 510 батир ээлерине берилген.
21-январда социалдык тармактарда жакында эле мамлекеттен ипотекалык программа менен алынган батирлер ижарага берилип жатканы тууралуу жарнамалардын сүрөттөрү жарыяланып, мунун мыйзамдуулугу талкууга түшкөн.
Расмий маалыматка ылайык, Кыргызстанда ушул тапта 40 миңден ашуун адам мамлекеттик ипотекага кезекте турат.
Быйыл жыл башында “Менин үйүм 2021-2026” программасынын негизинде жарандарды социалдык турак жай менен камсыздоого багытталган жарлыкка кол коюлган. Аны чечмелеп Фейсбукка пост жазган мамлекет башчы Садыр Жапаров МИК жалпы 40 райондо, 32 шаарда жана жети облустун борборунда көп кабатуу үйлөрдү кура баштарын билдирген. (ZKo)