Шаардык сот Темирлан Султанбековдун бөгөт чарасын өзгөртүүсүз калтырды
"Бул жолу дагы маалымат каражаттарынын өкүлдөрүнө сот залына кирүүсүнө, видео тартуусуна тыюу салынды. Адвокаттар бул чечимге каршы дагы арызданууга ниеттенүүдө жана аны талап кылып келишет".
Атамбаев Султанбеков сотко конвойдун жардамы менен, таяк таянып келгенин кошумчалады.
Социал-демократтар партиясынын лидери, 26 жаштагы Темирлан Султанбеков, партиянын мүчөлөрү Ирина Карамушкина жана Роза Түрксевер 2024-жылдын 13-ноябрынан бери камакта.
Аларга Кылмыш-жаза кодексинин “Шайлоочулардын добушун сатып алуу” беренеси боюнча кылмыш ишин козголгон. Бишкектин Свердлов райондук соту 15-ноябрда үчөөнү эки айга камакка алган. Партия өкүлдөрү айыпты четке кагып, саясий куугунтук деп баалап келет.
Бишкек аймактык шайлоо комиссиясы козголгон кылмыш ишине жана тергөөнүн маалыматтарына таянып, Социал-демократтар партиясын 17-ноябрда өткөн Бишкек шаардык кеңешине шайлоого катышуудан четтеткен.
9-январда сот кармалгандардын камактагы мөөнөтүн дагы эки айга узарткан.
Султанбеков 13-ноябрда милиция кызматкерлери кармаган күндөн тартып саясий ачкачылык жарыялаганын билдирген. Жакындары ал чектелген өлчөмдө суу жана шире гана ичип жатканын, бул аралыкта 12 кг арыктап, саламаттыгы начарлаганын айтып, бийлик башындагылардан аны бошотууну сурашкан. Адвокат анын ден соолугу начарлап, өз алдынча баса албай калганын билдирген.
Жазаларды аткаруу кызматы "Темирлан Султанбековдун абалы канааттандырарлык" деп бааланып жатканын "Азаттыкка" билдирген. Мекеменин басма сөз кызматы ал тергөө абагынын медицина кызматкерлеринин тыкыр көзөмөлүндө экенин кошумчалаган. (КЕ)