Американскиот дипломат Шоле утре во Скопје на средба со Ковачевски

Вишиот советник на американскиот Стејт департмент Дерек Шоле утре ќе престојува во Скопје. Предвидено е тој да се сретне со премиерот Димитар Ковачевски, со кого ќе разговара за повеќе прашања, меѓу кои енергетиката, економијата и борбата против корупцијата.

Делегацијата што ја предводи Шоле ќе биде пречекана пред платото на Владата.

Целта на посетата на Шоле на Западен Балкан, како што претходно соопшти Стејт департментот, е да ја нагласи трајната посветеност на САД за мир, стабилност и просперитет на Западен Балкан.

Неговата посета на земјава е во рамки на балканската турнеја, за време на која ќе ги посети и Косово и Србија.

Шоле требаше да ја посети Македонија во декември, но таа посета беше откажана бидејќи, како што беше соопштено, американскиот дипломат бил заразен со коронавирусот.

На 9 јануари на заедничка прес-конференција со министерот за надворешни работи, Бујар Османи, американската амбасадорка во Скопје, Анџела Агелер посочи дека советникот Шоле со неговата посета ќе ги потврди заложбите и поддршката на САД за Северна Македонија.

„Со Шоле ќе се дискутираат заедничките приоритети, а борба со корупцијата ќе остане приоритетот за Вашингтон и ќе покрене неколку прашања за време на неговата посета оваа недела. Оваа, 2023 ќе биде една многу интензивна година за вас, а тој ќе ги потврди заложбите и поддршката на САД на секој можен начин“, рече Агелер во одговор на новинарско прашање.