Масовни протести во Иран поради големата инфлација и економските проблеми
Протестите во Иран поради падот на валутата и стравот од инфлацијата продолжија втор ден во главниот град, и покрај обидите на безбедносните сили да ги растераат толпите со солзавец.
Радио Фарда на РСЕ објави на 29 декември дека толпи луѓе биле видени како извикуваат слогани за економската состојба и против владата на собирите во Големата чаршија, каде што многу трговци ги затворија своите продавници, но и на други места во центарот на Техеран.
Среде знаците за колапс на економијата под тежината на меѓународните санкции, иранската валута падна на рекордно ниски нивоа на девизните пазари.
Шефот на Централната банка се повлекуваСреде превирањата, иранските медиуми објавија дека шефот на централната банка, Мохамед Реза Фарзин, одлучил да се повлече. Портпаролот на претседателот Масуд Пезешкијан изјави дека шефот на банката, кој ја извршуваше функцијата од декември 2022 година, ќе биде заменет од поранешниот министер за економија Абдулнасер Хемати, кој беше разрешен од пратениците во март.
Иранскиот риал се тргува на неофицијалните пазари по околу 1,4 милиони за долар, во споредба со околу 800.000 пред една година. Официјалните девизни курсеви се подобри, но недостапни за многу ирански поединци и бизниси.
Многу продавници се затворија бидејќи трговците, во знак на протест им се придружија на демонстрациите.
Скандирања „Смрт на диктаторот“Исто така, имаше извештаи за толпи кои скандираа „смрт на диктаторот“, слоган што често се слушаше за време на масовните национални протести „Жени, живот, слобода“ што го потресоа Иран во 2022 година. Видеата покажуваат судири со безбедносните сили кои користеа палки и солзавец.
Во необичен потег, домашните државни медиуми, вклучувајќи ја телевизијата и радиото, исто така известија за протестите.
Новинската агенција Фарс призна дека се одржуваат на неколку локации во Техеран, забележувајќи дека луѓето скандирале политички слогани.
„Овие собири би можеле да станат нова платформа за активностите на ќелиите на немирите“, објави Фарс, кој е поврзан со Исламската револуционерна гарда (ИРГЦ), предупредувајќи на „несигурност“ и „дестабилизација“.
Новинската агенција ISNA објави дека менувачниците се затворени поради нестабилните пазарни услови.
„Повеќето менувачници изразија загриженост и непријатност поради релативното затворање на пазарот поради сериозните флуктуации“, се вели во соопштението.
Заменик-министерот за внатрешни работи, Али Акбар Пурџамшидијан, изјави за ISNA дека трговците треба да имаат „трпение, толеранција и поддршка и да не дозволат психолошките операции да ја разгорат пазарната атмосфера“.
На 28 декември, иранската канцеларија за статистика објави дека инфлацијата достигнала 52 проценти. Истиот ден, Пезешкијан им го предаде државниот буџет на пратениците, ветувајќи дека ќе се бори против инфлацијата и високите трошоци за живот.
Економската состојба на Иран се влоши поради тековните санкции на САД, како и повторно воведените санкции на ОН откако Иран не успеа да ги продолжи преговорите со Вашингтон за неговата нуклеарна програма и престана да соработува со Меѓународната агенција за атомска енергија.
Во септември, кога беа повторно воведени санкциите на ОН, слушател на Радио Фарда испрати порака во која се наведува дека инфлацијата веќе е „надвор од контрола“.
Друг слушател рече: „Луѓето го менуваат начинот на кој штедат и како се задоволуваат себеси... [а инфлацијата] врши притисок врз пазарите како на пример, врз златото и доларот“.