د سوريې په غوطه کې په جلا جلا بریدونو کې لسګونه کسان وژل شوي
د سوريې په ختیځه غوطه سیمه او شمالي ښار عفرین کې په جلا جلا بریدونو کې لسګونه کسان وژل شوي دي.
د سوريې د بشري حقونو ډله وايي، په غوطه کې د روسيې الوتکو په تازه بمبارۍ کې ۳۱ کسان وژل شوي دي.
اخوا بیا په عفرین ښار کې د ترکيې ځواکونو په هوايي او ځمکنیو عملیاتو کې ۲۰ کسان وژل شوي دي.
ترکيې د سوريې شمالي ښار عفرین او شاوخوا سیمې کلابندې کړي دي چې کُرد وسلهوال ترې وباسي.
څارونکو ویلي، له غوطې سیمې څخه د پنجشنبې په ورځ شاوخوا ۲۰ زره کسان تښتېدلي دي.
دغه راز په تېرو ۲۴ ساعتونو کې له عفرین ښار څخه ۳۰ زره ملکیان وتلي دي.